CONDEMNED2BLOODSHOT恐懼鬥屍

講開喪屍恐怖Game，機迷十居其九會想起《Biohazard》，但其實好多廠商𠵱家都食住呢條水嚟開發。世嘉喺兩年幾前幫Xbox360推出護航作品《Condemned》，玩法唔失禮得到幾好評價，如今遊戲延續篇順理成章登陸埋兩大平台。今集無論單機抑或連線都做到血花四濺，誓要靠恐怖感成功建立另一品牌，為求長賣長有！

文：陳福榮

■成班暴徒冇面見人，單係呢個造型已教人不寒而慄。

■遇害者死狀全部慘不忍睹。

■面上有血十字，唔慌好人！

■嘩！好大隻中屍毒老鼠呀！

■血淋淋剝皮人從天倒吊，驚。

瘋狂弒血大激鬥

為咗支持05年底面世嘅Xbox360，美國世嘉搵Monolith（記住唔係日本專寫RPG嗰間）炮製咗隻氣氛相當恐怖嘅《Condemned》，作為跟機造勢先發作品，雖然銷量唔係特別標青，但總算令人留下印象，覺得呢隻判出去嘅外發嘢唔差得過自家製作「死人屋」。事隔兩年有多，副題叫《Bloodshot》嘅續集亦應運而生，當然願意再下一城嘅原因係PS3已經推出，始終世嘉係傾向力撐佢嘅大廠之一，比起單喺360度出𠵱家有兩部機分擔成本，計落點都抵啲。
故事方面，身為SCU（連環案件調查科）探員嘅男主角Ethan，喺機緣巧合下要面對一班窮兇極惡嘅唔怕死喪屍，為求保命兼搵出事件真相，於是靠一對沾滿血腥嘅拳頭，與夥伴們通力合作，務求用盡一切方法殺出重圍。

■整啲咁逼真嘅新聞片段出嚟，令玩家投入感大增。

■睇見佢郁晒右手兜嘢劈落嚟，真係唔死都一身蟻。

任何物品皆可劈友

自從Rockstar嘅《Manhunt》面世以來，暴力遊戲開始步向玩盡天下意想不到武器嘅年代，而《Condemned2》亦不遑多讓，甚至稱得上係長江後浪推前浪。佢除咗一般長短火同利刀等「常規武器」外，其他可以用嚟襲擊敵人嘅毆打工具亦層出不窮，如廁板、磚頭甚至模特兒公仔四肢等，但最頂癮就固然係拎支保齡球樽嚟周圍扑人喇，同Capcom隻《DeadRising》入面啲怪雞武器真係有得揮。另外佢啲格鬥場面相當血腥暴力，Combo多且招式豐富，扭骨斷頸樣樣齊，務求要𡁻到班「喪B」唔曉郁為止。

■眼前大堆石油氣罐，如果開槍唔知會否連自己都波及埋？

■估唔到你咁Cool咁靚仔，居然會用保齡球樽開片……

■如果唔夠抽，不妨丟支氣罐出去，再開槍炸死條蛋散。

PDA用途多籮籮

如果講呢隻Game有乜特別，表面上佢係血流成河嘅專殺喪屍FPS，但實際上則滲入咗唔少解謎查案要素在內。　玩家不僅要以武力解決問題，想了解案件真相仲要食腦先掂，始終鑑證追兇並唔係單憑一股蠻力就OK。所指嘅係借助一部具備分析能力嘅PDA，主角要喺案發現場度抽絲剝繭，將屍體同血液作仔細分析，睇吓會否搵到半點玄機，因為好多時都要靠部機嚟過關。此外，受惠於主機嘅強大機能，遊戲場景變得充滿互動性同真實感，令唔少難關都有多過一種解決辦法，大大增加咗可玩性。兼且敵人行動唔再一味呆頭呆腦，若能善用甚至可以借佢哋對手嚟自相殘殺，咁就爽快到暈。

■只要善用呢部PDA，就能夠妥善解決一切問題。

■咁樣拎起部機，就可以檢查一下遍佈周圍血液嘅特性。

■PDA嘅另一功能，係拍低遇害者傷口形狀同翻查資料。

Profile

機種：PS3、Xbox360
廠商：Sega
類型：ACT
人數：1人（網上連線8人）
日期：發售中
售價：$328
查詢：CapcomAsia（23661001）

■男主角Ethan，係正宗搵拳頭打交道嘅強悍差人。