四川發生7.8級大地震，港股昨日不跌反升，嘉賓認為主要是市場上周已審慎觀望國內通脹數據加上內地落實加存款準備金率，待壞消息出盡後，大市會出現反彈；至於市場是否已全面消化地震的負面消息，嘉賓與主持人則意見有所分歧，不過，噚日啲Put輪就明顯較Call輪活躍。
孫：孫柏文 沈：沈振盈 趙：趙海珠
沈：如果唔係地震，大市唔單止高開1、200點咁少；以往多次喺中國公佈經濟數據前夕，大市會跌定先，好似上周大市最低穿過25000點；今次消費物價指數同加存款準備金率公佈後，如果唔係發生咗地震，仲會升快啲。其實上周大戶已經開始累積好倉，趁消息出嚟挾高大市。
孫：你話本周會上試25600點，𠵱家差50點就到，係咪升浪已完？
沈：我已經喺（周二）高位沽貨，25600至25800係重要關口位，相信第一次冇咁快升穿26000點，𠵱家先減磅，等落番至買過。
孫：地震對衍生產品市場有冇衝擊？
趙：地震對窩輪市場冇大影響，噚日仲佔整體大市20%成交，特別係恒指輪，佔整體窩輪市場嘅25%，當中Put輪比例佔60%，而且未全部沽貨走人，仍然相當活躍。
孫：地震消息係咪已經全部Pricein（反映晒）?
沈：相信已Pricein……炒地震天災短線會有震盪，但長線會帶動經濟。不過港股最多升至25600至25800點，5月份會係反覆市。
孫：仲有冇其他概念可以諗？
趙：受惠於重建基建類股份嘅窩輪噚日成交特別多。
孫：地震消息未必已經全面Pricein，噚日雖然反彈，但成交量唔大，即月期指仲低水百幾點，真係未知仲有乜嘢事發生。
沈：因為部份大藍籌喺今個月除淨，有百幾點低水亦係合理。
EMAIL解答：紫金太貴
Wilson：我7.9蚊入咗紫金礦業（2899），邊個位走好？
沈：我都唔會再推介紫金喇，因為金價走勢好飄忽，呢一刻你未清楚個商品價格走勢而去博就好危險，加上紫金市盈率唔算平，不明因素實在太多。佢反彈力度仍然一浪低於一浪，佢4月份彈到最高係9蚊，今個月都主要喺7蚊水平徘徊。我唔敢講佢幾時先突破，不過我相信金價未咁快有作為住，有機反彈到上去7.5蚊左右。仲有就係機會成本問題，我去買高市盈率嘅金礦股嘅升幅大，定係平市盈率嘅股份例如滙豐（005）呢？如果穩健嘅投資者都會係偏向買平市盈率同穩陣板塊嘅股份。
Wilson個案
買入價：7.9元
目標價：-
止蝕價：-
時期：-
港鐵6月返家鄉
葉小姐:我上次聽沈大師推介買咗港鐵（066），我34蚊買咗，沈大師個時講佢上望60蚊㗎。
沈：我推介港鐵嗰時係創過新高，不過佢𠵱家估值亦係偏低，基本因素係比較樂觀，大市氣氛唔就，加上地產股偏軟，所以佢股價下調。不過你可以揸住先，因為我相信佢喺25蚊已經初步見咗個底，𠵱家就等佢股價幾時會反映番佢真正價值，佢唔使等幾耐就有機會上番35蚊樓上嗰啲位。
孫：我自己對佢都好有信心，𠵱家仲有冇人炒港鐵輪？
趙：以前的確係好多人炒，不過𠵱家嗰啲輪都已經變晒價外，所以成個市場都只係得幾十隻港鐵窩輪，最近亦唔活躍。
葉：佢返家鄉係唔係放咗佢？
沈：𠵱家港鐵係整固期，所以我仍然相信6月至7月股價會上返34蚊，畀少少耐性喇。
觀塘葉小姐個案
買入價：34元
目標價：-
止蝕價：-
時期：一個月
中行4蚊樓上有風險
張小姐：我早幾日3.8蚊買咗中國銀行（3988），我4.1蚊無走到貨，其實佢可以去到幾多錢？
沈：中行股價上望空間唔係太高，我對佢亦都有戒心，我對佢管理層唔係咁大信心，因為佢哋有關次按嘅處理冇如實公佈，唔知佢仲有無嘢收埋無講，呢個係我所憂慮，佢返上接近3蚊水應有唔錯支持，不過要上4蚊樓上開始有風險。六行入面我都係比較鍾意招商銀行（3968）同建設銀行（939）。
孫：中行窩輪多唔多買賣？
趙：成交係有突然上升，內銀股窩輪亦成為炒作目標。
沈：升一兩日都無力嘅話你都要走一走，呢個星期個市上望空間都只係講緊300幾點，你運用資金要識靈活，因為𠵱家啲股份唔係長揸就可以返家鄉，可能一錯失一個高位就返唔到上去。
上水張小姐個案
買入價：3.80元
目標價：-
止蝕價：-
時期：一個月
港交所股價有支持
曾小姐：我想買港交所（388），佢業績預期會唔理想（今日公佈首季業績），想吼佢有壞消息，股價下跌撈貨。
孫：港交所生意額日日都公佈，佢業績真係無乜驚喜。
沈：如果你將佢今季成交量同上年第一季相比，我會覺得唔會差太遠，所以我唔憂慮，你要明白上年同期個股價差好遠㗎，𠵱家市盈率合理咗好多。另外窩輪發行費用收益都值得留意，因為輪場競爭激烈，窩輪數量只會越來越多，所以只要成交量保持800到1000億，股價都會有支持。
趙：我哋輪商發行好多新產品對港交所股價都會有支持，不過港交所嘅輪活躍度唔大，雖然仲有一啲輪喺市面，不過已經價外得好緊要，市場對佢需求都唔大，所以現存嘅幾隻港交所窩輪都已經唔啱炒。
曾：佢升得好快又跌得好快，咩嘢價入最好？
沈：如果佢盈利有增長，到20倍市盈率應該有支持，短期價位140蚊至170蚊左右，上望有14蚊水位，不過要承受10蚊風險，所以睇你等唔等，個市彈埋呢個位都會試試個底，個時買着數好多。
沙田曾小姐建議
建議買入價：140元
目標價：-
止蝕價：-
時期：兩個月
東方海外補裂口先入貨
譚小姐：我之前已經放咗東方海外（316），我見佢已經有個裂口位，諗住佢會回，點知佢仲企喺50蚊度，我想知佢有無機會去番45蚊嗰啲位度？
沈：裂口唔一定要補，股價唔一定要補完先上返，有啲裂口要補可能要等十年㗎，唔好話未補裂口就唔敢買，圖表只係參考。其實買東方海外要睇油價，如果油價再回調，佢股價有機會升多一口上去55蚊，整體航運業需求都有上升趨勢，所以我覺得佢短期都會喺50蚊樓上炒作。
長沙灣譚小姐建議
建議買入價：45元
目標價：-
止蝕價：-
時期：長期
每日收市後4:30pm
歡迎click入 http://finance.appledaily.com以webcam參與節目及收看
歡迎phonein28698262暢談心得email至mailto:[email protected]搶先貼股
今日嘉賓：
