周潤發呢個月尾會去倫敦同鞏俐合作演出西片《上海》（Shanghai），8月就會返香港拍杜琪峯嘅第一部西片《紅圈》（RedCircle），到年底可能又會再接拍一部西片《蠶絲》（ThreadoftheSilkworm），套戲改編自張純如嘅同名著作，故事圍繞著名科學家錢學森喺美國研究科學期間被美國政府懷疑係間諜，遭軟禁5年後返回中國嘅真人真事。
外形有出入
監製羅燕已經搵人改寫緊個劇本，佢話：「周潤發認為故事富挑戰性，非常有興趣演出。」不過羅燕覺得發哥外形同錢學森有好大出入，但相信發哥演技可以搭夠，戲中另一個要角錢學森嘅好友馬柏教授，電影公司就想搵德斯汀荷夫曼（DustinHoffman）主演，女主角同導演就正在物色中。對於呢部戲，發嫂噚日喺電話度話：「一切言之過早，暫時冇乜嘢可以回應。」