緬甸發生風災，竟然導致幾萬人死亡，過百萬人無家可歸，慘況實在太慘，難以令人相信。緬甸嘅獨裁軍人政府只靠槍桿子出政權，全無管治能力，預防設施不足，救援能力全無，於是平民百性，慘遭風災蹂躪。
現在國際救援組織紛紛表示願意緊急幫助緬甸人，香港有組織發動市民捐款，但緬甸軍政府抱鐵石心腸，聲明話歡迎海外物資/金錢援助，但唔預備請外國救援專家/人士入境，表示要自己控制如何發放救援物資，緬甸軍佬都信得過嘅？捐錢喎，容乜易落入獨裁殘暴軍佬之手，只係畀軍人食，不理平民死活呀！直至國際機構可以進入緬甸，直接到災區救援緬甸平民之前，左丁山斗零都唔捐！
美國啲人權分子在風災事件發生之前，已經採用新方式對付緬甸軍政府，就係用最新宣傳方法，類似建立品牌（BrandBuilding）策略，喚起世人注意緬甸。其中一款就係創製一個九十秒「廣告」，請明星EllenPage舉起一個示威牌，上書HitlerisaliveinBurma，宣傳片在Fanista.com播放，下個月再轉去YouTube及GoogleVideo。呢間公司Fanista.com實際上資助製作一系列嘅緬甸「廣告」，主題就係Burma:ItCan'tWait（緬甸不能再等）。
好多美國人其實唔知道緬甸位在地圖何方，對緬甸矇查查。美國有好多黑人同情非洲黑人，大明星米亞花露不斷為達富奔走，故此為達富請命運動籌到唔少錢，相反地，緬甸無人注意，整個「緬甸宣傳」嘅預算唔夠「達富計劃」一星期之用，於是關注緬甸嘅一小撮人就使用TVC（電視廣告）方法，請大明星義務出鏡，請專業導演，攝影師，創作總監出馬，攝製廣告片，引起注意。呢股風氣如果收效嘅話，唔係講笑，啲國際人權組織就會以同一樣招式宣傳西藏，到時內地啲知青憤青就要接招啦，畢竟在國際公關戰上，英語仍係國際語言，EllenPage好睇過陳冲，史泰龍勝過成龍！