劉德華同朱麗倩嘅緋聞傳咗咁多年，幾乎年年都俾人傳佢哋結咗婚，但華仔由始至終冇認過，噚日大馬方面又有消息話華仔靜雞雞過咗嗰邊，因為朱麗倩個妹結婚，前晚仲喺大馬擺酒，以華仔同朱麗倩嘅關係，佢又點可以唔出席呢個婚宴，據當地傳媒報道，華仔喺婚宴度仲唱歌祝賀一對新人。
整蠱新人
據當地傳媒報道，朱麗倩妹妹朱麗華前晚喺成功時代酒店宴會廳筵開70圍，宴請各方親朋好友，當晚朱麗倩一早到場幫手招呼親友，但華仔一直冇露面，正當大家以為華仔唔會嚟之際，佢竟然喺夜晚11點左右亮相，引起全場騷動。原來華仔諗住整蠱一對新人，話自己唔得閒嚟，點知前晚佢一早混入賓客席，到差唔多散席先至現身，令朱麗倩個妹好高興，華仔即場唱咗《如果有一天》呢首歌。噚日大清早佢就搭飛機趕返香港同媽咪慶祝母親節。噚日馮仁昭都有打畀華仔方面，可惜截稿前仍未聯絡得上。