母親節，最佳禮物不是錢、不是豪包高級酒家食一圍鮑參翅肚，而是百忙中抽空陪媽媽玩「煮飯仔」。一星期只得3、4天在港的鄧達智，母親節做了媽媽喜歡吃的西餐，有鮑魚海鮮，伯母吃得慣吃得讚，是為最窩心的母親節佳餚！
記者：廖秀娟
攝影：陳陶鈞
菜譜及示範：鄧達智
鄧達智（William）
身份為時裝設計師，但William其實４歲已開始入廚，留學加拿大的６年，更是天天為兩餐而下苦功。最擅長煮西餐，中餐亦了得，圍村菜亦難不倒他。
開胃鮑魚小食
2人份量
時間：15分鐘
侍奉媽咪，當然要吃得好，鮑魚夠體面又滋補，但William想到用意大利陳醋做汁伴兩頭罐頭鮑魚共食，快靚正又有新意，酸甜又不蓋過鮑魚鮮香，相信媽咪都讚好！
材料
兩頭罐頭鮑魚1罐、甜椒1個
醬汁料：意大利陳醋3湯匙、橄欖油2茶匙、鹽/糖各1/2茶匙
做法
1.鮑魚開罐，鮑魚切片，鮑汁可留起做其他餸菜。
2.甜椒切條狀，與鮑魚片一同上碟。
3.吃時蘸拌好的醬汁便可。
Ann：唔同顏色甜椒有咩分別㗎？
答：甜椒以歐洲貨最靚，最常買到係荷蘭貨。橙色最甜、黃色次之，之後係紅色，綠色已經冇乜甜味，反而有少少辛辣味喇！
黑色海鮮麵
2人份量
時間：30分鐘
鮮墨魚汁有陣淡淡墨魚香，配合幾片蒜片，很討人喜歡。
材料
新鮮小墨魚（連墨膽）1/2斤、鮮蝦4両、法國邊豆1/2磅、洋葱1/2個（切絲）、Lingueni意大利麵1/2包、Rugala意大利菜100克、鹽1茶匙、蒜片/檸檬汁/橄欖油各少許
汁料：意大利陳醋1湯匙、鹽1/3茶匙、橄欖油1湯匙
做法
1.煲滾大煲水煮Lingueni麵7至8分鐘，擱起瀝亁。
2.墨魚洗淨，拉出墨魚頭及墨囊，留起墨囊，清除身內「啫喱」及墨魚骨，墨魚筒切圈。
3.刺穿墨囊留起墨汁，加1:1份量的水攪勻。
4.起鑊以橄欖油爆香洋葱及蒜片，下蝦及墨魚圈煮至七成熟，下意粉兜炒後下鹽，墨汁水沿鑊邊倒下，全部材料兜炒至均勻便可上碟。
5.另以鹽水烚熟法國邊豆，撈起後下檸檬汁；Rugala菜加上汁料拌勻，將兩者圍在碟邊便成。
Gigi：整墨魚汁咁麻煩，點解唔買現成墨魚汁呀？新鮮的有咩好處？
答：新鮮墨魚汁帶墨魚香味，罐頭的不可比！況且墨魚取墨汁後也可以做餸，何樂而不為？
茴香鮮橙沙律
2人份量
時間：15分鐘
這個沙律用橙做，香甜又大路，媽咪都會肯試食。而茴香比唐芹淡味一點，清新醒胃。
材料
新鮮茴香2個、橙1個、橄欖油2茶匙、鹽/糖各1/4茶匙、檸檬汁/薄荷葉各少許
做法
1.茴香洗淨切去頭尾，將中間莖部切片。
2.橙去皮，留少許皮切成幼絲，橙肉切大粒。
3.茴香與橙肉、鹽、糖及橄欖油拌勻，加檸檬汁撈勻，面放薄荷葉便成。
余小姐：邊度買新鮮茴香？
答：高級超市同中環結志街市都有得賣！一個大概$11至$13，街市賣嘅通常新鮮啲。
白酒青口湯
2人份量
時間：20分鐘
鄧達智用新鮮新西蘭青口，配少量的迷迭香、香葉等，吃落香甜而有酒味，很吊人口胃。
材料
青口1磅、洋葱1/2個（切絲）、白酒1/2支、上湯1湯碗、蒜頭3瓣（切片）、迷迭香/香葉/Oregano/番荽/鹽各少許
做法
1.起鑊炒香洋葱及蒜片，下鹽及青口同炒，炒至青口半熟，開始分次下白酒，邊下邊攪拌。
2.至白酒香散發，下上湯拌勻，冚蓋煲滾青口湯。
3.開蓋下迷迭香、Oregano及番荽，最後下香葉，煮30秒然後熄火，再在湯上加少許香葉裝飾便成。
Ada：用咩青口最好？青口好韌係因為煮法還是材料有問題？
答：我鍾意用新西蘭青口夠新鮮；其次歐洲的藍青口都唔錯。青口韌主要係唔新鮮或者煮過火，買有齊兩個殼的新鮮青口，煮到佢開口就OK喇！
網上重溫
http://cooking.appledaily.com