油價不斷上升，航空公司會買期油對冲油價上升的風險，貴為有車階級嘅光頭仔都話要諗計對冲油價，敏妮相信佢應該唔會激到去買期油啩。
不過，講起對冲呢個話題，敏妮諗起當年領匯（823）上市時，大家樂（341）都有認購咗百幾萬個領匯基金單位，當時大家樂主席陳裕光曾經話，由於大家樂係領匯五大租戶之一，所以認購領匯作為對冲工具。佢呢招係若然領匯加租，佢作為股東都有着數。
加價刺激股價上升
其實，敏妮識得有個教財務嘅阿sir都係用呢個原理為佢嘅開支做對冲，例如佢家住九龍，屋企用煤氣，所以佢個portfolio裏面有中電（002）同煤氣（003）。除咗考慮當呢啲公司加價時，佢嘅股價會因加價消息刺激上升，幫補番緊隨加價而增加嘅開支，其實，呢啲股票都係穩定嘅收息股，阿sir計啱數，買入嘅股份可以收到足夠股息用嚟冚相關開支。
聽落呢個的確係一個幾好嘅方法，但敏妮用同一理念去搵相關股票，似乎又並非四海皆準，例如買金源米業（677）為屋企食米做對冲。前排話米價升，金源米業嘅股價的確飆升。問題係，呢啲只係短期炒作，金源股價升完冇耐就回番，其實金源只係食米代理商，米價貴咗，雖然佢會有來貨價較平嘅存貨，可以好似啲油站咁，加價快減價慢，但如果米價持續高企，對佢都冇着數，唔同中電、煤氣始終係供應商。
並非放諸四海皆準
又例如敏妮公司canteen係大家樂旗下泛亞飲食經營，咁係咪應該買大家樂股票呢？
機構膳食只係大家樂其中一項業務，而敏妮公司嘅canteen更加因為顧客有限，並非大家樂主攻對象，所以為咗節省成本，質素每下愈況，敏妮相信如果持有大家樂嘅股票，唯一目的就係喺股東會上向陳裕光先生提出敏妮對canteen嘅不滿。
所以純粹以「對冲」角度着眼，加上累積嘅不滿形成偏見，暫時唔會考慮大家樂！
網誌： http://wanmanli.com/blogs/