韓星阿Rain有份參演嘅荷李活電影《極速賽車手》（SpeedRacer），上周五正式喺美國上映，一如外界所料，影片喺當地嘅票房麻麻哋，開畫單日只係收585萬美元（約4,563萬港元），排第三位。叫好叫座嘅《鐵甲奇俠》（IronMan）則以近三倍嘅票房，即1,530萬美元（約1.2億港元），繼續成為美國單日票房冠軍。第二位就係金美侖戴雅絲（CameronDiaz）與艾斯頓古查（AshtonKutcher）合演嘅《一夜賭城戀大咗》（WhatHappensInVegas）。雖然《極》片喺美國反應麻麻，但喺韓國就備受矚目，上映前一星期已榮登當地預售電影門票第一位。