噚晚好多足球迷都唔可以咁早休息，事關英超煞科，成日總共有十場賽事舉行，其中重頭戲當然係韋根對紅魔鬼曼聯一役，最後曼聯由C朗拿度同傑斯各入一球，蟬聯英超冠軍。
唔知有意定無意、擇日定撞日，政府猛推但公眾反應一啲都唔熱烈嘅醫療融資計劃，就揀喺球迷捱夜睇波之後，即係今日喺幾家電視台推出宣傳短片，仲照搬踢足球做橋，搵晒有份參與醫療政策嘅大佬，齊齊亮相，推銷醫療政策諮詢，叫市民積極參與凝聚共識咁話。
加埋二百幾歲
八方睇過套短片，講話一眾醫療界高人着住車路士同意大利國家隊都有着過嘅藍色球衣，喺九龍醫院個足球場搓幾腳，除咗周一嶽之外，仲有金刀梁梁智鴻、方津生同埋醫療融資工作小組主席夏佳理。帶頭講第一句對白嘅係食物及衞生局局長周一嶽，佢雖然腳瓜起𦟌，成個甲組球員身形，但一開口就話：「我哋啱啱出嚟做嘢就響度踢波，話咁快就幾十年喇。」好明顯係叫大家唔好諗住喺呢段30秒短片，會睇到C朗或者朗尼仔嘅身手同腳法。不過佢哋sell嘢手法速度都好快，正如夏佳理所講：「唔好搓嚟搓去，睇準就射﹗」再同周一嶽夾番個單擋短傳：「醫療改革都一樣，睇準目標，做喇！」
呢套宣傳片拍得專業，個場景：樹蔭、綠茵球場，色調都好舒服吓，加埋剪接技巧，睇落都幾緊湊。不過實情係成班人加埋臨時演員，夾埋只係傳咗幾腳波，跟住就齊齊漫步，結果仲要坐住喺公園長凳度講㖭。借用已故體育新聞主播伍晃榮話齋：「千祈唔好以為呢場波好緊張，係我講得好緊張咋！」八方見段片個主題唔係咁突出，就為大家解讀一吓，就係：唔好諗，快啲磅水！
話時話，淨係四個主角加加埋埋都200幾歲，連金刀梁都自認，「我哋都就嚟70歲啦！」醫療融資計劃將來主要用家係在職人士，但搵呢班可能好快就退休嘅超齡人士推銷好似唔係幾啱數，唔通佢哋兵行險着，想透過佢哋唔係太快嘅動作，寓意融資影響咁大咁深遠，叫市民慢慢諗清楚！
mailto:[email protected]