近期焦點新盤，非信和嘅火炭御龍山莫屬，發展商繼公佈首批30個單位定價後，再以天價加推一個頂層連泳池特色單位，索價1.12億元，每呎26888元，挑戰新界區新高呎價，引起市場嘩然。
姑勿論呢個超級特色戶能唔能夠打破新界豪宅新高，對刺激銷情肯定起正面作用。
趁今日長假期最後一日，去大角嘴奧海城參觀吓示範單位，之後搭港鐵去九龍站上蓋嘅商場圓方，呢個場開張之後首次搞母親節活動。素以獨特風格見稱嘅圓方，利用突破傳統嘅手法，慶祝母親節，5月份呈獻以「媽媽萬歲」為主題嘅活動，透過設置唔同主題嘅大型藝術裝置，將新世代母親「時尚」、「性感」及「大無畏」多變嘅形象細緻詮釋。參觀之餘，消費滿1000蚊，可以換昂坪纜車車票。
