馮仁昭四圍超：
國產妙英通街舞冧暈趙世曾 - 馮仁昭

年逾70歲嘅富豪趙世曾，對內地美女情有獨鍾，過去五年同內地女友許冬梅（Wendy）經常出雙入對，Wendy仲入住趙苑做女主人，地位似乎穩如泰山，點知早排殺出國產程咬金妙英，即時傳聞滿天飛，仲傳妙英已經搬入趙苑㖭。
妙英能夠得到趙公子青睞，當然有佢本事，上周二（6日）晚10點零鐘，趙世曾就拖妙英去銅鑼灣食飯，當時妙英身穿鮮黃色連身泡泡裙，喺時代廣場附近單獨出現，冇耐着白西裝褸、雙手插褲袋嘅趙世曾翩然到場，妙英即時笑晒兼施展渾身解數，當街搔首弄姿、舞動長髮，動作多多，令趙公子睇到目不暇給。
趙世曾見妙英咁風騷固然四萬咁口，跟住兩人行去時代廣場方向，得寵嘅妙英非常雀躍，尾隨趙公子都要風情萬種伸懶腰，又圍住佢身邊氹氹轉，最後就一齊上食通天嘅食肆開餐。

一屋藏雙嬌

世事好蹺妙，其實舊年3月本報已經喺時代廣場同一地方影過趙世曾喺風雨下夜會妙英，當時女方為佢體貼打傘，呢段微妙關係至曝光，相隔一年妙英已威脅Wendy正印女友地位，就連趙世曾女兒趙式芝早排都爆老竇一屋藏雙嬌，趙式芝話自己由細到大見慣呢啲場面，總之老竇開心就得，佢咁開通，唔怪得之老父就繼續風流啦。