馬主Ｋ到北京公幹幾天，順便到北京嘅香港馬會會所一行，參觀一番，佢話馬會北京會所外形古雅，四合院形式，內部裝修美輪美奐，有餐廳，有住房（七十幾間），比五星酒店有過之而無不及。馬主Ｋ問清價錢，係一千八百元一晚，送早餐及機場接送，唔算貴噃。馬主Ｋ想話卜番兩晚住吓，先知道目前只有一半房間出租，其餘一半暫時未開放，仍須在裝修方面加工，而五月份就全院滿座嘞！馬主Ｋ其實並不急於住宿，只想在奧運期間到北京搵地方住，奧運住房套餐就不便宜咯，每晚收五千，至少住四晚，即最低消費由二萬元起。不過，想話搵君悅、半島呢類酒店呀？奧運期間，起碼七八千元一晚，一房難求！
馬主Ｋ巡完一輪馬會北京會所之後，覺得非常滿意，但最大發現係靚女多到數不清，所有侍應，服務員都係美女級數，可以來港競選香港小姐，經一番打聽，知道呢啲靚女有啲來自各地模特兒訓練學校，唔怪得身高身裁都合乎同一標準。馬主Ｋ叫左丁山快啲上北京一行，到馬會住幾晚，左丁山暫時冇咁多時間，遲啲先至諗啦，馬主Ｋ話：「遲啲可能唔見晒啲靚女喎！」又有咁快嘅？經馬會嚴格訓練服務態度之後，佢哋會畀其他酒店搶走呀？
馬主Ｋ回憶話：「八十年代中上海靜安區希爾頓酒店開幕之初，招聘到大量高度劃一嘅靚女做侍應及招待員，個個貌美如花，都唔知有幾多中外朋友因為咁而入住上海希爾頓。呢呢，開業後一年，第一批靚女已經唔見晒，你都知道發生乜嘢事啦！」知道都費事寫啦，無謂講。內地靚女有賣點，曝光後好快成為搶手貨，呢點大家都明。
馬會以服務取勝，不靠美女作招徠，反而馬會訓練先至係吸引新人嘅磁石，正是玉不琢不成器，啲新人經馬會訓練在北京服務一年，就有一張金漆CV，全國頂級酒店都會聘用。香港不止在服務行業方面領先全國，在其他領域亦不輸蝕，北京新景點鳥巢與水立方係外國建築師設計，結構策劃及工程係有香港工程師主導㗎。