去年六四前夕，總理溫家寶親筆回信畀一位香港小學生，中聯辦大鑼大鼓召咗大批傳媒聽李剛讀信，搞到班小朋友鬼死咁感動。最近又有一位小學生想寫信畀領導人，討論吓空氣污染問題，對象唔係溫總而係煲呔，仲打算搵埋班朋友仔聯署，唔知煲呔會唔會好似溫總咁，重視吓未來棟樑嘅意見呢？
話說噚日母親節，民主黨創黨主席馬丁喺一個母親節活動中同一個小妹妹交頭接耳，八方事後問馬丁，有咩令大狀同個小朋友傾得咁投契呢？馬丁話，呢位叫林天恩嘅小朋友，好關注環保問題，仲準備寫封信畀特首，問吓佢點解咁多食肆冷氣都唔係25.5度、空氣又咁鬼污染，馬丁聽到當然好安慰，話有呢個小妹妹接棒，佢退休都退得安樂。