中環在線:大陸散戶靠炒股上富人榜 - 李華華

中環在線:大陸散戶靠炒股上富人榜 - 李華華

無論經歷幾多次股災,仍有散戶前仆後繼入市,都係因為呢個冒險樂園真係可以令人致富。大陸雜誌《新財富》公佈新一屆「新財富500富人榜」,排第499位嘅黃木順,係第一位憑投資股票入榜嘅散戶。
同香港首富李超人同鄉,黃木順都係潮州人,據介紹,身家13.5億人民幣,持有澳洲國籍,喺深圳有家公司叫川業世紀投資,為人低調,年齡不詳,據聞第一桶金係來自投資中金嶺南呢隻大陸股票。
大陸報章《北京青年報》報道,該報記者曾多次打黃木順手提電話,但梗係搵唔到黃生啦!

長揸房地產股

黃生憑投資股票致富,大家最有興趣梗係佢嘅炒股心得。報道話,黃木順同股神畢菲特一樣,係價值投資嘅信徒,投資理念係揀啱行業,長期持有龍頭企業嘅股票,而喺眾多行業中,黃木順最睇好大陸地產,手持二千幾萬股大陸地產股泛海建設,係該股十大流通股股東之首;另外仲揸住北方國際、東華實業、華茂股份等。
不過,大陸宏調,房地產首當其衝,堅持價值投資嘅黃木順損失應該唔少。