恒指服務公司上周五宣佈，將騰訊控股（700）及中國鋁業（2600）加入成為恒指成份股，分別成為首隻入選藍籌的中國互聯網企業及金屬企業。有股份染藍，亦有股份被剔除，電訊盈科（008）及長江基建（1038）雙雙被剔出，令李氏家族藍籌數目由5隻減至3隻。
染藍股份大幅高開是可以預期之結果，而在新藍籌名單公佈前，騰訊股價先行急升5.5%，應有醒目資金預早估計到檢討結果，反而中鋁仍跌1.1%，入選有點爆冷味道，相信要追回落後升幅，中鋁今日應升得勁過騰訊。
中鋁今日料跑贏騰訊
事實上，每次季度檢討都會是大行出報告尋寶之時，法巴認為碧桂園（2007）過去一年市值高企，入選勝算頗高，而野村證券則另有心水，看好華潤電力（836）、騰訊控股、玖龍紙業（2689）、嘉里建設（683）及中國鋁業等股份皆有入圍機會，睇成績，野村大包圍估中晒兩隻新貴。
由於藍籌以市值及股份成交作為揀選標準，故此要揀新貴名單其實唔算太難，問題係入選之後又點？行業前景及盈利預測相信不會係恒指服務公司揀股準則，而以往亦經常有新貴入選後盈利質素大幅倒退，遇上行業下跌周期而股價大跌，經典例子係富士康（2038），06年9月入選無耐股價就見頂，之後勁跌一半以上，其他若干例子包括工業股及本地銀行股。兩隻新貴比較，會遇到周期風險機會較大嘅係中鋁，反而騰訊唔似會出現行業低潮，除非互聯網越趨不普及。