IQ題：母親節，全城最民主嘅地方係邊度呢？答案係鯉魚門，事關民主黨港島區支部噚日喺嗰度筵開300圍，招待過千名媽媽（ok，條IQ題好爛係咪？）。元老級人馬、已經宣佈唔再選立法會嘅馬丁最人氣，媽媽級粉絲個個上前問佢攞簽名，個個話唔捨得佢，果然魅力非凡。至於因為出選港島區問題而唔知有冇傷和氣嘅甘乃威同單仲偕，喺師奶輩中受歡迎程度勢均力敵，大家都送花送扇吸粉絲。而仲未放棄出選港島嘅黎志強，噚日好早就離場，唔知係咪已經知道自己冇乜出選機會。
阿仔陪過節
講番馬丁嗰筆先，唔好睇佢噚日咁風騷，俾萬千媽媽簇擁，事實佢內心唔知幾鬼失落，原本佢噚日應該同太太一齊飛日本，參加《信報》創辦人林行止個仔娶老婆嗰餐，但因為近排好多官司等緊佢打，惟有一支公留喺香港埋頭苦幹，寶貝仔祖詒見老竇咁慘情，book定枱同老竇食番餐日本菜，等佢唔使形單隻影過母親節咁話。八方聽到祖詒咁講，問馬丁囝囝算唔算孝順，馬丁咁答，「梗係孝順啦，我畀錢㗎喎！」咁又唔好咁講，其實後生仔呢，一年365日都為事業拼搏，一唔係就拍拖至上，肯抽時間陪吓兩老，算係好有心㗎啦，馬丁雖然講就話自己畀錢，其實個心應該好甜就真！