演技備受讚賞的黎耀祥，雖然多數演綠葉角色，但卻是10歲兒子黎正橋心目中的最佳男主角。不過，雖然祥仔是電視人，卻不准兒子隨便睇電視，食飯時更要把電視關上。至於培養小朋友，祥仔認為最好順其自然，如正橋小時候很怕水，於是祥仔循循善誘，鼓勵他克服困難，終成為快樂的小飛魚。
撰文：戴彩煥 攝影：陳順禎、仇志中 髮型：IvanLeeofHeadquarters
黎耀祥工作雖然經常日夜顛倒，但從沒疏忽對兒子關懷照顧，不用拍劇的日子，他會盡量陪兒子打乒乓波或游水消遣，或是兩父子飯後傾偈培養感情，最難得的，是年僅10歲的正橋能夠給予體諒。日前黎耀祥與太太Julia及兒子正橋接受本報記者訪問，問正橋可曾試過因為父親工作忙碌，沒時間陪他而感到不高興時，他一副大人口脗說：「冇乜所謂嘅，有時佢返幾日唞幾日，爹哋乜嘢都關心我。」
「好鍾意睇爸爸做戲」
有一個做明星的父親，感覺怎樣？正橋嘟起小嘴緊鎖雙眉說：「覺得好煩，啲同學成日明知故問，又問我爹哋做乜做乜，一個問，跟住個個都問！有啲會叫我搵爹哋簽名，我唔理佢哋。爹哋冇乜唔同嘅，都係一個爸爸啫。」儘管正橋口口聲表示父親跟普通爸爸沒兩樣，但言語間，仍難掩那份有個明星爸爸的喜悅。
父親每當有劇集出街，正橋幾乎全部都有捧場，芸芸劇集中，正橋最喜歡《秀才愛上兵》，覺得父親好有型。雖然，在他口中父親的演技只是「OK」，對觀眾和網民給予父親支持也只輕輕說句：「冇所謂。」但身旁的Julia卻禁不住踢爆：「其實佢好鍾意睇佢爸爸做戲，好崇拜爸爸，不過佢覺得講出嚟好老套，所以唔好意思講出口。」
「總之盡力而為就得」
不過，黎耀祥雖然是電視人，卻不准兒子隨便睇電視，連黎耀祥也覺得有點兒矛盾：「都幾矛盾㗎，有啲小朋友好老積，睇電視學大人講嘢，但佢細個嗰陣我唔俾佢睇電視，係因為我唔想小朋友養成一個睇電視習慣，唔想電視成為佢生活一部份，唔想電視代表送飯，冇咗電視唔得。香港有好多小朋友或者大人，當睇電視係一個習慣，冇咗電視唔得，一返到屋企就開住個電視機，食飯又開住，就算唔睇，有啲聲都好，所以佢出世至5、6歲階段，我唔俾佢睇電視，後來個仔大個咗開始接觸社會，咁就一定要俾佢睇啦，但食飯嗰陣我一定會熄電視。」
不少家長為栽培子女仆心仆命，安排一系列一連串課外活動讓子女參與，希望提升他們學習能力和興趣，偏偏黎耀祥大唱反調：「好多父母好介意子女成績，好想佢哋嘅子女得，俾佢哋學好多嘢，好似以前我老婆好想個仔學鋼琴，但個仔唔鍾意彈，老婆好唔開心，猛鬧個仔，我就同老婆講，你係咪想個小朋友開心？如果彈得唔開心，咁就唔好彈啦，音樂係令人開心，彈一啲唔開心嘅音樂，不如唔好彈，卒之個琴賣咗。」黎耀祥覺得人生其實很化學，未必人人能夠擁有將來，所以每個階段，只管去做好每個階段的事情便足夠：「我唔心急要個仔呢樣要識嗰樣要識，總之盡力而為就得。」
「只係想佢享受玩水」
培養小朋友興趣，黎耀祥認為絕不可勉強，最佳培育子女的方法就是順其自然發展，不能操之過急，如正橋小時候十分怕水，黎耀祥於是用其循循善誘方法讓兒子克服困難，結果，今日的正橋，已獲選為游泳校隊B隊成員，蛙式、背泳、自由式和蝶式，樣樣皆能。
究竟怎樣令兒子克服怕水困難？黎耀祥說：「我帶個仔去游水，只係想佢享受玩水，佢初頭好驚，我咪陪佢玩水，攬住佢喺水度行嚟行去囉，到佢克服到唔怕水，我咪畀多啲機會佢試囉。小朋友最緊要有一個信得過嘅人喺身邊，就會覺得安全，父母同子女建立嘅關係就係佢信得過你，信你嘅話乜嘢問題都解決。個仔去到3、4歲階段，變成好鍾意游水，我哋想話搵個教練教佢，等佢姿勢可以正確啲，佢話唔使，因為唔想俾人管住，後來佢喺泳池識咗個教練，就話如果我哋要請教練嘅話就請嗰個，就係咁，佢跟個教練學咗幾個月，學番啲正確姿勢，𠵱家四式都識，仲叻過我。」
教仔心得：鼓勵多看新聞
現今的電視節目，黎耀祥從不覺得適合小朋友收看，就算是他主演的電視劇，他也希望是給大人欣賞，他說：「我覺得就算製作人從小朋友角度去諗，永遠都設計唔到一個適合小朋友睇嘅節目，除非嗰班製作人係讀晒兒童心理，唔係我哋着晒怪獸衫出嚟就啱小朋友，所以我從來唔覺得電視應該俾小朋友睇。但冇辦法，社會係咁，我只能夠揀啲傷害性冇咁大，唔俾佢睇血腥暴力嘅戲，同埋喺合家歡時間陪佢睇，我唔得閒就媽咪陪，好少俾佢自己一個睇電視。」
了解兒女看法
黎耀祥不會要求兒子收看特別的益智節目，因他覺得電視始終是娛樂，但就會叫兒子多留意新聞，知道社會有甚麼大事發生的同時，更能帶出父子間的話題，了解兒子對事情的看法，從而灌輸他正確的價值觀。《一百萬人的故事》（小圖）或專題性新聞節目，也是不錯的選擇。
電視畫面不時出現一些親熱或性感鏡頭，黎耀祥又怎樣向兒子解釋？他笑說：「我好開放，我都會同個仔講點解會有BB，如果你熄電視，只會令成件事有反效果，小朋友會問點解大人睇得我唔睇得，個仔有乜問題我哋都會照傾，既然政府都覺得冇問題（指合家歡時段），即係睇得啦。」一直細心聆聽父親講說話的正橋，不忘加點意見：「其實我覺得係唔係合家歡又唔係一個問題，電視台又唔會過9點半就好勁嘅。」
學習珍惜機會
黎耀祥的教子心得，就是學曉怎樣向子女拒絕，他說：「𠵱家社會，好多時父母兩個人都要出去做嘢，冇乜時間陪小朋友，惟有買好多嘢畀佢哋玩，用物質同錢去取代對小朋友嘅關心，覺得畀嘢佢哋滿足佢哋要求，就係好㗎啦，但我覺得同子女相處嘅時間，比任何嘢都重要，我同老婆平時冇乜應酬，一放工就返屋企陪個仔傾吓偈。」
重視親子交流
黎耀祥表示，兒子不時要求買PSP遊戲機，但全被他一一拒絕：「我唔肯買PSP畀佢，係因為我知道佢一出街就會攞住部遊戲機玩，大家出去飲餐茶，變成佢有佢打機，你有你睇報紙，大家感情完全冇交流，正如點解我唔俾個仔一路食飯、一路睇電視一樣，起碼我同佢飲茶嗰陣，大家可以傾吓偈，唔一定要講啲好深入嘅問題，但日積月累，可以加重大家相處嘅感覺，我成日好重視就係呢啲嘢。
「我唔係覺得遊戲機唔好，而係我唔想佢養成一種要乜有乜嘅習慣，佢要乜有乜嘅話，就唔識得珍惜，正如我做呢行、行呢條路，見到好多新人唔識珍惜機會，我哋個年代，畀一套劇你擔正做主角，做得唔好就冇下次，所以我哋好明白要識得珍惜，買玩具都係同樣道理。」
待人接物最難教
作為父親，最令黎耀祥頭痛的是如何教導小朋友禮貌，他說：「大人同一啲熟朋友相處，通常唔太拘泥禮貌，小朋友好多時睇到就有樣學樣，同人傾偈態度唔得誠懇。冇辦法，𠵱家個個屋企都係得一個仔女，變咗小朋友唔係好識同人去建立一個關係，佢眼中淨係睇到父母同朋友嘅關係，佢就會覺得對人態度就係咁。呢個係好難解決嘅問題，好難教。」
「越大越冇禮貌」
黎耀祥自言是由傳統方式教大，從小知道待人要有禮貌有規矩，他也不是一出道便含住金鎖匙受力捧，知道要付出努力才能成功，所以對兒子待人接物十分關注，他說：「呢個係個人修養，人哋點睇你係好緊要，越大越冇禮貌，第時大個出嚟點做嘢？咪鬼死咁寸？死梗啦，你唔係李澤楷，點寸都冇人話你，但我哋呢啲唔得㗎嘛。」黎耀祥坦言已時常不厭其煩地提醒兒子待人要有禮貌、要誠懇，但問題依然未能完全解決，令他最為頭痛。
我是誰：白領變身豬八戒
即將擔正重頭劇《妻妾成群》（暫名）的黎耀祥，現年43歲，83年加入無綫電視營業部當文員，兩年後放棄文職工作，加入藝員訓練班，89年開始拍劇，多演配角。96年在《西遊記》中演豬八戒（左圖）開始受觀眾注目，精湛演技獲認同，甚至比不少男主角更搶鏡，近年受不少網友追捧，其入木三分的演技，更為他贏得「綠葉王」的稱號。此外，他也參演過不少電影，其中以98年在《風雲之雄霸天下》飾泥菩薩（右圖）一角最令觀眾印象難忘。
