科聯（046）呢家集成服務及解決方案企業，預期PE得6倍幾，加埋集團又係現金牛，冷灶煲得過。科聯07年度（12月底止）純利翻一番到2814萬銀，往績PE得9倍幾。集團喺07年嘅年報講，話手頭定單上到3.2億銀，呢個數額，同07年度收入3.59億銀差無幾，已經坐定粒六。何況祖國經濟及金融業，家陣仲係高速增長，科聯食住個勢上，繼續肥仔水。好保守計數，科聯08年度純利增長，只係翻半番咁大把，純利上到4220萬銀，預期PE得番6.5倍。同類股之中，科聯抵到爆。
科聯上年底嘅手頭淨現金，高達兩億銀，每股淨現金0.8元，每股淨現金比率超過70%。個市又開始搖擺不定，科聯現金牛，防風力又勝一籌。冷吼科聯，以08年度10倍PE做目標，科聯講緊係要翻半番到1.61元。而呢個目標PE水位，仲係好抵買。
堡獅龍0.35元兜一轉
堡獅龍（592）08年半年度（12月底止）純利上到4046萬銀，半年嘅純利，已經超過07年（6月底止）十五個月純利919萬銀水位，業績谷底勁彈。就當08年下半年度純利，睇齊上半年水位，堡獅龍全年度純利上番8000萬銀，PE得7倍幾。又呢期本土龍頭佐丹奴（709），由3月低位彈升咗超過30%，堡獅龍郁都冇郁過，實情好落後。堡獅龍再跌，昅實0.35元支持兜一轉，短打博升20%見0.42元，PE仲未有耐到雙位數。