周潤發：日日通電
「作為子女其實唔應該只係喺母親節先去盡孝道，當媽咪年紀越嚟越大時，做子女嘅一定要畀多啲關懷佢，好似我同媽咪就幾乎每日都會通電話，關心吓佢。父親節同母親節都係好有意思，所以喺母親節，我會同媽咪、哥哥、家姐一齊同媽咪食飯慶祝，另外又會畀錢佢買嘢食。」
楊千嬅：鑽戒贈母
「母親節當日朝早要排舞，所以下晝唔可以陪媽咪去飲茶，但夜晚就一早約好晚飯慶祝母親節，而禮物亦一早準備好，今年我送咗一隻鑽石戒指畀媽咪，噚晚返到屋企我將份禮物放咗喺飯廳嘅生果盤入面，然後叫媽咪去尋寶，當佢見到一隻好閃嘅鑽戒時，佢真係好開心，見佢咁開心，我都好開心。」
梁詠琪：陪享齋菜
「母親節我會全日陪住媽咪同婆婆飲茶食飯，我準備送一對鞋畀媽咪，因為媽咪每朝早都會練功，但佢着嘅鞋唔多似練功鞋，所以我就諗到買對練功鞋畀佢。今晚晚飯會食齋，因為婆婆食咗好多年齋，所以同親婆婆食飯，我哋一定會就佢，媽咪好錫婆婆，咁我同細佬當然會好尊重婆婆。」
蔡少芬：遙寄心意
「我阿媽去咗旅行，如果喺香港一定會同佢慶祝，但佢成日周圍去玩，其實我對阿媽咁好，每日都係母親節啦！唔會只有呢一日至陪食飯或者送禮物。今年多咗個媽咪（丈夫張晉的母親），到時會打個電話畀佢講聲母親節快樂，哈哈！我都要睇吓老公送乜嘢禮物畀我阿媽，我至決定買乜嘢禮物先。」
何韻詩：雙喜臨門
「每年我生日同母親節都好近，今個星期六係我生日，咁會一次過慶祝埋，到時都係飲吓茶。同埋我哋全家人好耐冇一齊去過旅行，我想補送一個旅行畀佢哋，睇吓媽咪鍾意去邊就去邊，由佢決定。」
小慧女兒：不捨買禮
劉小慧昨日帶同兩女兒及母親到將軍澳出席活動，9歲的蘇君蕎長高了許多，問君蕎送甚麼給媽咪慶祝母親節，她竟張口無言，小慧即接口說：「送花囉，我哋日日都係母親節，聽晚（即今天）大家會一齊食飯慶祝。」司儀問君蕎是否捨得用自己零用錢買禮物給媽咪時，她直說：「唔捨得。」
古仔：回港齊消夜
「我𠵱家身在外地拍廣告，要深夜先返到香港，所以今日母親節都陪唔到佢食飯，不過如果今晚返到屋企佢仲未瞓，我會陪佢食消夜，同佢傾吓偈，離開咗香港成個禮拜，我都好掛住啲屋企人同埋阿Lo（狗）。今年嘅母親節禮物，離港前送咗畀媽咪，我知道媽咪好鍾意手袋，所以就買咗個手袋送畀佢。」
葉翠翠：儲錢醫母
葉翠翠昨日出席無綫在九龍灣的宣傳時說：「噚日已經同媽咪喺屋企煮飯慶祝咗，不過就係佢落廚。其實之前都講過會買層樓畀媽咪，等佢住得舒服啲，當係母親節禮物。𠵱家最重要係搵醫生醫好佢嘅腎病，都預備咗六位數嘅診金。萬一唔夠無論借好點都好會搵番嚟，所以𠵱家會盡量慳錢。」
薛凱琪：帶母公幹
「我已經一早買咗件衫同一個袋送畀媽咪，本身一早已經同公司mark假，但係我有工作要去台灣，所以我諗住畀個驚喜媽咪，就係帶埋佢去台灣。雖然過去台灣我要工作，但佢可以見個女，而且我可以做完晒嘢同佢去食飯。」
蔡卓妍：送靚披肩
「我𠵱家喺泰國拍緊《風雲II》，因為呢個月都好忙，所以上月底趁有時間就已經喺屋企同媽咪食飯慶祝。我送咗一條五位數字嘅披肩畀媽咪，因為有一次佢睇外國雜誌時見到嗰條披肩，話好鍾意，於是我靜雞雞左託右託咁搵朋友，真係畀我朋友幫我買到，當媽咪收到呢份禮物時都好意外。」
鍾鎮濤：合力製畫
「我哋一家會提早一日去飲茶慶祝，我哋經常都係咁。今年我會幫囡囡製造驚喜畀佢媽媽（范姜右），個女鍾意畫畫，所以會畫一幅畫，家姐幫手揀顏色，我負責題字，同埋代囡囡請媽媽食飯。」
