今日是一年一度的母親節，在這個溫馨的節日，郭可盈實行一展廚藝，精心炮製拿手好餸咕嚕大蝦球，還有甜到入心的芒果布甸白朱古力士多啤梨，𠱁得母親心甜之餘，也食指大動。親自下廚的可盈表現得似模似樣，加上有媽咪在旁不時提點，發現她們母女心有靈犀，經常思想行動一致，可盈更笑言她們從行街、購物、食飯及運動等口味均相似，堪稱母女Twins。
在調製甜品的過程中，可盈十足頑皮小孩般，嚷着要用生果砌出媽咪的樣子，媽咪則竊笑說：「乜你咁曳呀！」在媽咪的心目中，可盈永遠是個長不大的好孩子；而在可盈心目中，媽咪永遠是撒嬌的好對象。
採訪：陳寶明 攝影：陳慧安
場地提供：Cucina@MarcoPoloHongKongHotel
囡囡話
好多心底話對你說
郭可盈為了今個母親節，特別炮製一道好意頭的菜式──咕嚕大蝦球送給媽咪，取其好意頭嘻嘻哈哈，可盈笑說：「我哋兩母女有時都幾蝦碌，講飲講食我同媽咪都好鍾意，我試過下廚煮餸，媽咪都讚㗎，佢最鍾意食我嘅柚子手撕雞，母親節條街好多人又要訂位，不如喺屋企自己煮。」
一齊打波一齊唱K
在Cucina行政總廚歐陽松基指導下，煮餸時一副大廚風範的可盈自問廚藝甚到家，但面對媽咪就會回復其小女孩模樣，她說：「我以前細個覺得媽咪好似鬼婆，記得我二年班時生得好細粒，又肥又矮，媽咪嚟接放學，我抬頭望住媽咪，佢好高大個鼻又高，不過喺我心目中，媽咪由小至大都高貴優雅，哈哈，我就係似佢呢樣，文龍話我第時老咗個樣會好似媽咪。」
可盈又承認以前為事業打拼，甚少陪伴家人，不過近年她的事業方向有變，有較多時間與家人相聚。她說：「我有好多心底話都會同媽咪講，佢令我好有安全感，係值得信任嘅最佳聆聽者，我哋嘅性格都係好感性，一齊睇悲情戲投入起嚟會一齊喊，不過我比較硬頸獨立，媽咪比較溫柔，但係大家都易心軟，我同媽咪成日去行街，買嘢嘅審美眼光差唔多，又一齊打羽毛球同唱K，佢鍾意睇啲電視節目，我又鍾意，大家有講唔完嘅話題。」最後她也不忘祝願天下父母有個溫馨幸褔家庭。
媽咪話
我係最佳嘅聆聽者
郭媽媽在可盈烹調美食期間，提到愛女與自己同是感性之人，郭媽媽說：「有次我睇電視播緊肥姐追悼特輯，我一路睇一路喊，我打電話畀阿盈，原來佢都睇到喊，我覺得大家有啲心靈相通。」
「阿盈嘅廚藝OK㗎」
郭媽媽又說：「我有四個小朋友，佢哋細個時候好難照顧得晒，所以培養阿盈獨立性格，我自己好靜，阿盈好動啲，性格又強啲，似爸爸囉，我同阿盈成日傾偈，我係佢最佳嘅聆聽者，佢講多過我講。」她又大讚女兒為人好學，說：「阿盈細個係肥妹仔，點知大咗咁瘦，佢好鍾意食嘢，有時出街食飯，發現有美食佢就會記低啲材料，跟住返屋企研究點整，咁我哋就一家人分享美食，阿盈嘅廚藝OK㗎，總之食得落口啦！」
對於可盈自言小時候較反叛，郭媽媽說母女間難免有不同意見，但她們甚少吵架，只是說話時大聲一點而已，一定無損母女感情。
郭家食譜
孝順女郭可盈趁着母親節，特別花心思下廚冧媽咪，以簡單快捷方法烹調出一餸一甜品，十分有心思。
咕嚕大蝦球
材料：大蝦八隻、番茄兩個、青紅椒各兩個、新鮮菠蘿、豆粉、雞蛋兩隻
煮法：將大蝦洗淨去殼、去蝦頭尾及內臟，吸亁蝦身水份後，再將豆粉及雞蛋分別攪拌，然後逐隻蝦球放落雞蛋及豆粉漿中，開鑊炸蝦約4至5分鐘至金黃色，撈起瀝亁油份。再將青紅椒、菠蘿及番茄切塊加入甜酸汁內一起煮及打芡，接着淋在蝦球上，咕嚕大蝦球便完成。
芒果布甸白朱古力士多啤梨
材料：芒果、紅桑子、龍珠果、紅加侖子、士多啤梨、麥維他餅亁、吉士醬
煮法：芒果打成糊狀放在甜品杯底層，再在吉士醬內加入各種生果放入杯內，然後將餅亁壓碎後鋪在上面，最後再在面層按喜好排上士多啤梨、紅加侖子、紅桑子及朱古力裝飾等。
四代同堂幸福滿瀉
郭媽媽共有四名子女，她回想郭可盈小時候，提到一件令她難忘的趣事，她說：「阿盈大約11歲時，我哋一家人去澳門旅行，嗰時天氣係深秋，我哋玩到好熱，除咗啲外套，點知佢將所有衫着晒上身，個樣好好笑。」郭媽媽說起這段回憶，臉上不禁掛起溫馨的笑容。
另外，可盈的外公已經102歲，如今仍然十分健康，小時候慈祥的外公最喜歡抱着她與家姐玩，可盈笑說：「家姐已經有仔女，加埋外公係四代同堂，我哋一家人嘅感情好好。」
