今日是母親節，不少子女都忙於為母親慶祝。栢芝媽昨日為有份投資的日本菜外賣店剪綵，透露栢芝與霆鋒經過淫照事件後更加成熟，感情穩定，又坦言事件最鬧哄哄的時期曾安慰栢芝。
已是第二任外婆的張栢芝母親，昨日到荃灣出席有份投資的日本食品外賣店剪綵儀式。自言投資達六位數字的栢芝媽，提到淫照事件後栢芝的情況時說：「我當時有同佢傾，同埋鼓勵佢，至於復工未就等佢自己講番啦。」
「成熟咗好多」
問到一直盛傳栢芝再度懷孕，又有指她與霆鋒婚姻亮起紅燈等，栢芝媽堅定地說：「栢芝𠵱家未有（懷孕），但係佢不嬲都好鍾意細路仔，佢隨時準備好㗎喇。佢哋兩個婚姻冇問題、好恩愛，我好放心。（經過事件後）佢哋兩個成熟咗好多，好識諗，唔需要我擔心。」但當問到鋒芝關係是否「雨過天青」時，栢芝媽則說：「我唔係好識，唔知點講。」
栢芝媽又提到今日會一家人慶祝，今年可與兩個外孫一同過母親節更是高興，並謂曾與栢芝分享湊仔經，她說：「我都係同兩個孫仔玩吓多，佢睇書同上網學咗之後教番我轉頭㖭，話𠵱家新潮湊仔唔同我哋以前㗎喇。」
軒仔減少曝光
至於有份出席剪綵儀式的張敬軒則透露，是因為舊老闆兼好友陳少寶才出席剪綵，他說：「我同佢算係亦師亦友，我有唔明嘅嘢都會問佢，同埋我今年會減少曝光，注重番音樂方面，唔使次次出嚟都係講王菀之同關智斌。」對於好友側田與的士司機發生糾紛，他說：「應該唔關佢事，其實佢係餚底嘅人，可能佢有啲不知所措啦，佢係一個鱷魚頭老襯底嘅人，應該係有啲誤會啫。」
採訪、攝影：藍文浩
