鄭大班議員睇完篇「標籤法打殘國際城市」，打電話嚟大罵左丁山受人誤導，亂咁寫。左丁山聽完電話後，問吓反對派議員Ｌ，佢又炮轟鄭大班誤導，讚左丁山寫得清楚。
反對派並唔係特區政府眼中「親疏有別」之反對派，呢個年頭，亁坤大挪移，疏派變成親派，保皇黨變成反對派，反對派變成保皇黨，令人眼花撩亂。
標籤法之保皇黨就係李華明及民主黨，反對派係前線、自由黨、一半民建聯；早餐派未知態度如何，令食衞局十分頭痛。據議員Ｌ講，民建聯最初一貫保皇，支持修例，但代表進出口界嘅民建聯議員黃定光聽到業界反映，標籤法不止影響帝國主義貨物，更嚴重打擊國食品入口之後，立即強烈反對。外國商會最緊張，全部搵駐港領事出頭，美國領事仲到立法會旁聽會議㖭，日本領事就約見啲反對派，游說佢哋將「條例」修訂。
外國領事一來為咗本國商業利益，二來為咗自己口腹之慾。譬如日本包裝食品，在標籤法修訂之後，好多會在香港超市消失，唔到佢哋唔起動也。議員Ｌ又話，外國人（如餐廳Ｒ）之投訴，話將來喺Great、city'super買唔到之商品，並非外國人獨有例子。零售界功能組別議員方剛亦有講過，但方剛係特別到天水圍搜購嘅，方剛在天水圍買到嘅包裝食品，在修訂標籤法之後，會在店舖失蹤。
保皇黨動員醫生、營養師、消委會、家校會向議員施壓，反對派就組成零售聯盟，外國領事撐場，雙方勢均力敵，已經驚動曾特首，令他眉頭皺。你知啦，香港要做國際城市，點可以俾外國領事投訴呀。造成如今局面，有人指主持食物政策嘅何玉賢醫生立場僵硬，兩年來同反對派議員討價還價，寸步不讓，不肯聽意見所致。是耶非耶，不必深究，勢估唔到當初以為追上時代，修訂標籤法並不困難，點知道當事者策劃不周，搞到正反雙方嚴重對立。標籤法不是最低工資，冇中央幫手兼且傷害祖國貨利益，政府未必壓得住反對派㗎。