aprilia推出SHIVER750，係新手同女車手嘅喜訊。唔係歧視女性，只不過揸電單車講求一定體力，唔係一味扭大油就得。對新手嚟講，可能啱啱甩「P」揸250揸到悶，但一跳跳到1,000c.c.級別又未必有信心駕馭到。
SHIVER750就正正填補到aprilia街跑車系嘅空隙。身懷Ride-by-Wire燃油噴注系統，而且低轉唔算瘋狂，爆發力逐級上。唔好睇佢外表咁野性，要馴服佢，無想像中咁難。
撰文：嘴嚼爺
攝影：譚盈傑
Model：Kiko
車尾雙喉搶分
由鋼、鋁合金製成嘅車架，集合同廠SXV、RXV車系技術，剛性不容懷疑，金黃色外露車架先搶我第一眼。SHIVER750外形延續同廠街跑風範，頭燈同油缸線條最搶，細看之下，43mm倒立前叉，120mm行程單筒油壓避震，V2引擎、180後輪，十萬車價畀得舒服。不過筆者最欣賞，都係車尾經凳底出嘅雙喉，雖然比想像中靜局，但外觀已攞晒分。同級高手眾多，HONDAHornet600、YAMAHAFZ6、SUZUKIGSR600、KAWASAKIZ750、DUCATIS2R800、BMWF800S，點鬥？邊架靚好主觀，齋睇份尾，我一定揀佢。
被封印的馬力
睇SHIVER外形相當兇狠，原來得95匹，唓！喂，電單車，你95匹推架千三車仔載足5個人，我95匹推189kg兩個轆坐兩個人，力量幾大自己諗諗。其實，95匹已經極容易令你段段超速，不過話明新手都啱揸冇壓力，梗有啲鬼馬嘢嘅。SHIVER擁有廠方全新研製嘅Ride-By-Wire系統，會根據轉速、波段、扭油幅度嚟決定適當嘅供油份量，簡單啲講即係令你更容易控制，避免出現車惡過人嘅情況。仲有，廠方將SHIVER調校得比較柔和，4,000轉以下都唔會有驚人爆發力，到6,000轉你先會有解除封印嘅感覺。所以，提供足夠空間畀新手或女車手適應。題外話，各位老電友睇咗V3拉打（幪面超人V3）未？未睇可以慳番，嗰啲所謂飛車場面，唉，都係劉華好。
apriliaSHIVERSL750Profile
引擎：749.9c.c.四衝程水冷V2DOHC引擎
馬力：95hp/9,000rpm
扭力：8.25kgm/7,000rpm
傳動：六前速腳波
車輛提供：亞林電單車（23850181）