出家人不問世事，寶蓮寺釋智慧大師卻係非一般僧人，噚日佢喺寶蓮寺主持浴佛慶典，之後大講佛偈，道理高深。八方聽聞曾憲梓係噚日慶典嘉賓之一，但最終冇現身，釋智慧話曾憲梓可能有啲嘢放唔低，同時做出舉火炬動作，「可能佢早幾日開心得滯，今日嚟唔到啩。」曾憲梓爭做火炬手備受批評，放下呢啲慾念咪冇事囉！
智慧大師冇份傳火炬，有人問佢會否上京睇奧運，佢參透世情，指上京「係當權者先有嘅利益」，既然自己已經唔係人大，不再當權，亦冇利益，相信冇人會邀請佢，相信要留喺香港睇電視。
做多三年方丈
唔做人大，大師仍然俗務纏身，佢透露噚日本來係三年方丈任滿之日，本來諗住退休清修，唔再做主持，因已經75歲，一副臭皮囊早就七勞八傷，但董事會要求佢續任三年，待萬佛寶殿落成先可以退下來，佢惟有喺紅塵世界打滾多三年，不過佢話近年工作順利得多，事關同特首煲呔施主係30幾年老朋友，萬事有商量，反觀同老董就「格格不入」，點極唔明。
大師講嘢百無禁忌，死穴係西藏問題，有人問佢有何高見，佢低眉合十，「多講多錯，少講少錯，唔講就唔錯。」得道高僧原來係太極高手。