被指獲中聯辦力挺出選九西嘅梁美芬，噚日接受港台訪問時，被問到係咪中聯辦欽點候選人，風頭火勢佢唔敢認住，好巧妙咁答，表示自己同中方各部門、單位都關係良好，其中同司法部最熟，因為多年前佢北上讀法律，將判例英譯，做咗唔少功夫搞好關係。
佢又話涉足選舉後，有關佢嘅傳言不絕，包括有人以為佢係「疑似特首候選人」梁振英細妹，有人又傳佢係前律政司司長詩姑、前市政局主席梁定邦親戚，總之姓梁就同佢有關，又有人話佢係共產黨員，八方覺得最離奇，係佢話有人指佢係民主派，呢頂帽子，梁美芬除都除唔切。九西形勢混亂，梁美芬話要恭喜九西居民，因為大把選擇，八方認為選民未必咁諗，有得揀陳太、余若薇就開心，𠵱家咁嘅貨色，焗住啃咋。