昨日講開八九月間香港有奧運與傷健奧運馬術賽，到時香港唔知有幾多傳媒記者識得報導。交完稿後，從馬主N口中得悉，奧運馬術公司會喺五月二十四日星期六在屯門騎術學校舉辦一個「奧運馬術親體驗──傳媒工作坊」，邀請傳媒界派記者（已註冊採訪奧運馬術（AccreditedReporter）），包括文字記者、攝影記者到場參加。邀請函已送出畀晒各傳媒。呢個工作坊由朝早九時半開始，一直到下午六時，內容相當密集，有參觀馬房，介紹（一）準備馬匹出賽，（二）盛裝舞步，（三）場地，（四）障礙賽，（五）越野賽，（六）示範，（七）照顧馬匹，（八）經驗分享，可能有名人親身說話。
呢類工作坊具教育性質，但限於一日，時間實在唔夠，相信係畀記者得到基本概念啫，方便佢哋他日採訪工作。老實講，做到奧運AccreditedReporter，相當唔易，有機會上堂學習，更加難得，豈可錯過。
據經常到屯門公眾騎術學校練習嘅靚女K講，名人利子厚、吳夏萍、余文詩等都係馬術發燒友，未學馬術之前，原來先要學曉照顧馬匹，呢項運動以馬為優先，樣樣要照顧到馬之尊嚴、福利與健康，奧運馬術賽特別注重馬兒好，呢個概念對好多人嚟講，或者新鮮一啲，我哋好容易以為馬術賽以人為主，隻馬只係匹動物、工具而已，聽完靚女K所言，先知道係大錯誤。
馬術在性質上係運動，照顧馬兒多啲，係啱嘅。賽馬在全世界嚟講，既係運動，亦係金錢，與歐洲足球差不多，足球既講技術、球品，亦更講金錢，卡卡、C朗、林柏特就係證明。今年美國肯特基打吡，由BigBrown勝出，第二名係一隻三歲馬女EightBelles，冠亞軍同屬五十年代馬王NativeDancer後裔，過往十四年來，肯特基打吡冠軍都係一樣。正因如此，美國育馬者與馬主好鍾意NativeDancer血統嘅新馬，但呢系馬有一個毛病，就係馬一對大腿容易受傷。EightBelles跑完打吡，立即受傷要人道毀滅，○六年冠軍Barbaro亦因同樣傷勢而人道毀滅，呢種傷患有DNA遺傳，但美國育馬界仍然追逐NativeDancer，正一係廣東話所言跑死罷就！