嘉雯係白花油公主，事關佢成日都搽白花油，話「聞一聞、索一索」精神啲喎。噚日佢返到嚟又成陣白花油味，點知佢呢次話：「係我對波鞋搽咗白花油咋。」原來佢對波鞋嘅白色膠部份變黃，喺網上好多人教佢，可以搽白花油喺變黃部份，令佢變番白，「好似真係白番啲喎。」
吓？白花油王子使唔使叫佢拍番個廣告呢？中大化學系教授曹宏威話，可能因為白花油係油性物質，有面變黃嘅部份溶解，不過佢話：「但如果變黃好耐，效用應該唔係咁顯著。」
至於坊間話用牙膏嚟擦，曹宏威教授話係因為牙膏有漂白作用，都可能令變黃部份白番啲啲。
Nike就搵咗波鞋專家Retrokid教路，佢話波鞋保養嘅兩大敵人係陽光同濕氣，所以波鞋要放喺冇陽光、亁爽地方，唔係成日着，要放幾粒防潮珠再用保鮮紙包住防濕氣，波鞋就冇咁易變黃。波鞋都可以變番白，人做錯咗嘢，一樣可以洗底嘅。
電郵：mailto:[email protected]
逢周六、周日刊出