聽「羊咩鬚」拉拿斯講，碧咸件銀河戰衣，成為07年全球銷量冠軍（25萬件），而佢哋嘅專賣店都成日斷巿，搞到好似好搶手咁。
小記噚日做完操練，順便行吓呢間除咗波衫外、冇乜嘢吸引嘅專賣店。唔知係咪被「羊咩鬚」洗過腦，或者係其他隨行團友推波助瀾，情況就好似香港新樓盤開售咁，小記受到熾熱氣氛感染，無啦啦攞出115美金（約港幣$890），買咗一件就嚟斷碼嘅08年落場版長袖銀河主場波衫。
其實，科水嗰一刻都有些少後悔，不過聽到團友講，件落場版香港冇得賣，所以終於克服心魔，接受「豪一次」呢個事實。點知，返到酒店上網搵資料，發現完全一樣嘅波衫，香港只售$520，美國呢邊買足足貴咗$370。嘩，救命呀！