從政嘅人口水寧舍多，政府可能怕佢哋口水過剩，平日開區議會都消耗唔晒，噚日再召開地方行政口水大會，花多筆公帑畀佢哋大噴口水，煲呔都唔執輸噴埋一份，噚日更「突然」宣佈公共圖書館延長開放時間，一星期開足七日。
以事論事，呢個係便民德政，社民連阿牛卻指煲呔又玩親疏有別。佢話近日好多民建聯區議員掛出橫額，要求延長圖書館開放時間，原來通通係春江鴨，早知政府有呢項新措施，就搶先攞彩，咁樣偷雞向市民領功都唔光彩。
不過都唔係人人「恨」攞彩，民建聯鍾樹根話十年前做市政局議員時已建議圖書館延長開放時間，不過官員諸多反對，小小甜頭其他人好似執到寶，佢話懶得邀功。