我就嚟三張仲學人砌模型儲合金，年紀大？唔緊要，身邊大把豬朋狗友一樣個個月買山口式。童年回憶買少見少，高達、Macross見到厭，唯獨Bandai超合金魂有本事定時定候出嚟搶一筆，大空魔龍、新舊三一、六神殺到班Fans一頸血。而我嘅DreamToy係《超獸機神斷空我》，二十年古董版索價$8,000，所以重出嘅$1,300超合金魂版就啱晒我口味，本來度緊掃埋佢新嗰隻Brave合金版獸裝機攻，可惜睇完上色實物後真係嚇一跳，大合體尚算呃得吓人，一分體即死，不論人形、車形定獸形，隻隻都樣衰到極點，上色核突似異獸戰、姿勢木獨似二十年前變形金剛，最攞命係索價6萬3日圓，成四千幾銀港紙，我寧願執齊黃金十二宮好過。
估唔到喺玩具討論區上，居然有一班小朋友話鍾意，好多仲已經落埋定，齊齊力撐咁話。突然覺悟原來只係自己Out，呢類新玩具已經唔啱我呢啲又老又窮嘅人玩，不過請廠方高抬貴手，唔好繼大地、大海魔龍後，再一次玩殘我童年偶像吖！
記者：藤原忍
獸裝機攻合體後成30cm高，有型有款叫呃得吓人。（約港幣4,600）
官方網址： http://www.cmscorp.jp/products/bg16_dancouganova.html