北京向來對《蘋果》唔係幾友善，今年8月，八方擔心橙都成為全國「禁果」。奧運聖火傳送期間示威頻生，令北京對有人喺奧運舉行時搞抗議提心吊膽，國際奧委會日前特別去信各國奧運代表，告誡運動員應該避免展示政治、宗教、種族宣傳嘅服裝、手勢或動作，言下之意，即係叫健兒唔好玩嘢，乘機表達支持西藏、解決達爾富爾問題訊息。
運動同政治應該分家，但唔代表運動員言論自由要受剝奪，促請北京改善人權嘅「橙色運動」（ColorOrange）發起人、丹麥雕塑家高志活（JensGalschiot）就質疑國際奧委會同北京，有冇可能禁絕一切示威行為，佢近日向支持者發出「溫馨提示」，指即使北京佈下天羅地網，都可以大模廝樣入場表態。
高志活指大家可以着橙色衫、褲，帶橙色袋，或者拎支橙色筆入場，如果俾人留難，就理直氣壯咁話「我鍾意橙色」、「橙色最襯我」，相信保安都冇符。高志活又話，為提高突破封鎖成功率，大家最好着奧運贊助商嘅橙色衫或用品，睇錢份上，有關方面點都要放你一馬。
顯示高壓下都有公義
如果大家唔想太高調，或者保安真係杯弓蛇影，逢橙必阻，禁止所有着橙色衫嘅人入場，高志活仲有一條絕橋醒畀大家，就係袋個橙入場，睇比賽中途，施施然拎個橙出嚟慢慢搣皮，如果好彩畀鏡頭影到上鏡，咁就可以突破封鎖線，畀全世界人都知道「橙色運動」訴求。
呢種打游擊奇招防不勝防，北京可以禁止現場觀眾拉橫額、嗌口號，但冇理由剝奪食生果、吸收維他命C嘅天賦人權啩！除非今年8月開始全北京禁售鮮橙、橙汁，限制鮮橙入口，或者將買橙嘅人一律打為反革命分子，不經審訊就關入秦城，剝奪政治權利兼食橙、睇《蘋果》權利終身，否則人手一橙，睇你沒收得幾多個！
高志活呢條橋，靈感唔知係咪嚟自月餅餡藏字條號召起義故事，佢冇機會去北京現場見證盛事，但希望透過電視畫面睇到一點點橙色，顯示喺高壓之下都有公義。北京面對奇招有何對策呢？棄用彩色，黑白廣播賽事咪得囉！
mailto:[email protected]