四年一屆立法會任期就快結束，噚晚就搞咗一個FunDay等議員同採訪立法會線嘅記者，齊齊放開工作玩埋一堆。全晚嘅其中一個焦點，係議員同記者比賽玩Wii遊戲機，雖然項目係難度一啲都唔高嘅跑步同拳賽，但對唔少除咗手機之外，就唔多掂電子產品嘅議員嚟講，仍然唔講得笑。
話說四名議員代表，包括郭家麒、譚香文、上屆議員劉炳章，同臨時拉夫參賽嘅余若薇。咪以為跑步人人都識，一向動作幽雅，連鬧人都冇乜火、斯斯文文嘅余若薇，就因為唔想太大動作，兩隻手各拎住一個遙控器fing吓fing吓，結果就因為太過就住，跑得太慢被淘汰出局。輪到遊戲機決賽，係議員代表同記者代表舉行拳擊格鬥，議員代表由已經唔做議員嘅劉炳章擔任，佢對住記者對手都好肉緊，五分鐘左右嘅賽事，係咁出拳，仲幾乎真係打到記者個人咁滯，結果記者不慌不忙，冷靜面對，仲憑住年輕，同最重要係喺電子遊戲方面有豐富經驗嘅強大優勢，最後以技術擊倒，打到螢幕畫面上嘅劉炳章成個人瞓喺擂台。
劉炳章同余若薇，前者用力過猛，後者就留力，結果都要出局。八方諗，唔通呢啲就係議會嘅生存之道？咁又未必，事關以立法會同政府咁強弱懸殊，立會就算出盡力，政府幾乎仍然主導一切。睇番議員炮轟財爺鬍鬚曾，喺辯論財政預算案時玩潛水，向唐唐投訴，結果都係不了了之，當冇事發生。
梁家傑扮煲呔
每次FunDay，就有議員俾人攞嚟開玩笑，噚晚記者同議員又合作搞話劇。仲搵嚟李華明笠頭套扮詹培忠、梁家傑戴住個bowtie扮煲呔，仲有行家着起有哲古華拉肖像嘅T恤扮長毛。論外形，以肥仔明嘅扮相最神似，難怪真人版潮州怒漢都要上台同佢合照。
而喺烹飪比賽中，黃容根同記者合作一味「大包容春卷」，雖然整咗出嚟嘅造型同味道都唔夠吸引，但竟然畀人覺得，呢道菜其實喺度玩扮議員遊戲，事關呢味春卷嘅用料係：菜、素、肉，加埋春卷個樣真係麻麻哋好睇，搞到在場好多議員同記者都會意咁笑起上嚟，「仲似過搵人扮喎！」
mailto:[email protected]