做得醫神，一定會好注意生活同飲食健康，自己向來好少食煎炸嘢，但唔知點解近兩日左邊嘴角無緣無故潰爛，雖然唔算好貪靚，但個嘴搞成咁始終令人好心煩，希望睇醫生攞啲特效藥食，可以快啲好番，點知原來係「冇得醫」嘅唇瘡。
醫生話我生咗唇瘡，罪魁禍首係感染咗疱疹一型病毒，𠵱家未有藥可以殺死呢種病毒，最快兩個禮拜後會自己好番咁話。
唇瘡其實係一種好普遍嘅口腔疾病，為咗令大家對唇瘡有多啲了解，特登上咗衞生署牙齒俱樂部網頁搵咗啲資料同大家分享吓，原來疱疹一型病毒最鍾意潛伏喺身體嘅神經結入面，當抵抗力轉差嘅時候就趁機發作，因為冇辦法完全消滅呢種病毒，所以一旦感染咗，就會時不時發作，好似疲勞過度、壓力大、感冒、女士經期，甚至曬太陽過度，都會令疱疹一型病毒變得活躍。
點解我哋無端端會惹到疱疹一型病毒，原來唇瘡嘅分泌物係會帶有病毒，如果接觸到分泌物就會感染，好似kiss咁，就係高危行為。病發嘅時候除咗會爛嘴角外，病毒有時會上埋鼻，嘴唇同鼻孔邊緣都會生一堆小水泡，當小水泡穿咗，就會變成形狀不一嘅潰瘍，通常痛幾日個傷口就會慢慢結焦，兩個禮拜就會完全好番，搽藥膏可以減低患處不適，但未必可以加快康復。
既然唇瘡冇得醫，我哋惟有靠提高自己免疫力，好似要充份休息、飲食要均衡、唔好食咁多辛辣食物，都可減低復發風險。
blog主：醫神