中國「體壇第一家」霍震霆家族近月為北京奧運忙到出煙，日前再爆出驚人消息。新加坡傳媒報道金牌運動員郭晶晶有咗BB，唔可以參加奧運，正辦理退出國家隊手續準備養胎，不過報道冇提及大家最關心問題，晶晶個肚經手人是誰呢？
霍震霆答得玄
茲事體大，八方即時致電霍震霆查證，一來佢係體壇重量級人物，二來晶晶同佢個仔啓剛係緋聞男女，如果晶晶懷孕，佢肯定好緊張。不過小霍今次好口密，「哎呀，唔答嘞！」呢個回覆，予人無限想像空間。
香港《文匯報》則引述國家體育總局宣傳司發言人表示，冇聽過晶晶懷孕兼準備退出國家隊呢件事。呢個消息傳出後，晶晶本人、領隊未有親自公開表態，傳媒只能向晶晶身邊人探口風，有同晶晶相熟人士好驚訝咁話，晶晶目前不可能懷孕。
晶晶本月初參加國際跳水大獎賽蒙特利爾站比賽，之後返北京繼續準備奧運。有人翻查紀錄，指新加坡傳媒05年曾傳出晶晶懷孕傳聞，後來國家體育總局同晶晶分別出嚟闢謠，估唔到同一謠言又再出現，今次唔知幾時先收科。