美股下挫，港股未受影響，專家認為市場氣氛好轉，同時，電訊業重組消息傳出，短期可小注中國電信（728）。
孫：孫柏文 張：張小喬 郭：郭家耀
孫：美國股市下挫，點解香港股市好似唔係太受影響？
張：市場又再傳出電訊業重組消息，個別H股如中國電信（728）更逆市升逾2%，炒認購證嘅投資者就要將注碼收細，集中炒個別股份，如中電信，睇佢有無機會繼續上升。
孫：前幾次佢炒上都係有重組消息，咁究竟會幾時出現重組？
張：內地傳媒都出嚟講唔知幾時，所以炒呢個消息係有風險。不過，過去四日輪場有超過1億淨資金流入中電信認購證，反映投資者真金白銀持倉過夜，所以都係值得留意嘅股份。
孫：即月期指仲係低水，驚唔驚會影響投資組合表現？
郭：大家都擔心外圍表現，內地Ａ股又去到高位，驚有回吐，所以買個保障沽期指。滙豐（005）同恒生（011）呢個月會除息，亦令期指低水情況加劇。美股跌係因為美國證監會要求金融業要披露更多資本情況同投資情況，股民怕會有更多不利消息傳出，令金融股受壓，對投資者信心亦造成影響。
比亞廸電子唔穩陣
譚小姐：我喺8.76蚊買咗比亞廸電子（285），我見佢喺8.5蚊個位有支持，之後又去過9蚊，所以我上望10.5蚊。
孫：呢隻股諗唔諗得過？
郭：比亞廸管理層之前有傳聞，拖累佢股價，呢啲價位博反彈可以，不過始終唔穩陣，一定要嚴守止蝕。
張：佢股價持續跌穿10天同20天線，要撈低可以等佢突破8.43蚊，到時留意番都未遲，不過𠵱家就仲未有低位反彈訊號。
郭：呢隻股走勢真係好差，如果你買之前又未睇清楚嘅話，真係唔好胡亂博反彈。
《長沙灣譚小姐》
買入價：8.76元
目標價：10.5元
止蝕價：-
時期：三星期
EMAIL解答：中國木業換馬中移動
Ken：我喺0.259蚊買入中國木業（269），坐艇坐到𠵱家，再溝貨好唔好，或低啲先至追入？
張：中國木業股價無好大成交，證明唔多人撈底，另一方面佢做緊一個三角形走勢，一爆邊唔知佢會爆去升嗰邊定跌嗰邊，我唔係咁建議你溝貨，因為佢無特別利好因素，亦無咩特別概念。亦唔建議追貨，因為佢有機會再跌，到時你就會蝕多啲，所以我建議適當時候要壯士斷臂沽咗佢，之後可計劃另一次策略，買第二隻股份。
郭：大市反彈咗咁多，佢股價都無跟住走嘅話，一定係有因由令佢一直低迷。做錯投資決定一定會，不過換馬揀番優質股如中國移動（941），追番損失都會比較好。
孫：你換咗馬之後可能就會有希望㗎喇。
每日收市後4:30pm
歡迎click入 http://finance.appledaily.com
以webcam參與節目及收看
今日嘉賓：亨達集團研究部董事黃敏碩
歡迎phonein28698262暢談心得
亦可email至mailto:[email protected]搶先貼股
