柴米油鹽醬醋茶樣樣都加，百物騰貴。小妹人工都有得加，不過只係得雞碎咁多，食晏都要就住就住。小妹最鍾意去燒味店食吓乳豬飯，特別係太興燒味嘅乳豬雙拼飯最和味。點知早排去太興燒味食飯，覺得啲乳豬size越切越細，今個月同哎吔男友雄雄再去，連至愛雙拼飯都冇咗乳豬，仲加價到43蚊。雄雄忍唔住向經理發火。
經理解釋話，因為豬價貴咗好多，一隻豬嘅成本要成300蚊，乳豬就更貴，如果仲設外賣或者堂食乳豬，回唔到本，所以最近決定唔賣乳豬。經理見雄雄咁失望，就叫佢食燒肉，話最多送多一嚿畀佢。不過，雄雄仲係好似八婆咁，𠵱𠵱哦哦話要食乳豬，唔係要豬肉喎。
𠵱家啲嘢咁貴，小妹惟有四圍搵啲特價嘢食，海皇粥店近排反其道而行，不但冇加價，仲減價㖭，好似油炸鬼同炸嘢都減1蚊。小妹噚日打電話去灣仔嘅海皇粥店，職員話南瓜粥仲減成4蚊㖭，不過減價優惠去到5月，6月有冇優惠暫時仲未知。
電郵：mailto:[email protected]
逢周六、周日刊出