歲月在他們的世界凝結無聲，不知人間何世，不知容顏易老，他們不懂得買手袋、不認識康乃馨，自然也不會知道，天下間有這麼一個日子，被冠以「母親節」一個如此煞有介事的外號。但他們認得媽媽，每次跟媽媽見面，都會捉住媽媽的手，記得手的溫暖、記得手的粗糙，比大部份人，更明白母親節的意義。記者：張嘉雯
「我好幸運」是麥太的口頭禪，一次訪問說了幾十次，雖然她兩個兒子中度智障，長子世昌41歲，只會說「爸爸」、「媽媽」；三子世裕38歲，兼有過度活躍症，是社福機構眼中的「百厭仔」。「有時啲人講說話好難聽，『人生仔，你生仔，點解你生兩個咁嘅仔？』，聽到個心好痛。」
世昌雖然不太會說話，但見媽媽來中心探訪，就打招呼，就拖着她的手，做手勢問大家吃飯沒有。問題大的，是較年輕的世裕，小時候已經極活躍、易𤷪𤺧，讀特殊學校時「搞搞震」，要獨立鎖在一間房，在庇護工場又發脾氣打人，庇護工場換了一個又一個，臭名遠播。
「佢放工周圍去，整爛人哋啲衫。」喜歡小朋友的世裕有次跑到公園跟小朋友玩，卻遇上惡婆婆，「佢好大聲鬧世裕，『你黐線㗎，你癲狂症㗎，青山出嚟㗎。』真係好難聽，句句都夭心夭肺，篤落我個心，令人好難受。」
媽媽心痛，回家就打得他一身籐條痕，「我當時好嬲，如果佢唔係，就唔使俾人指手畫腳，老公返嚟同我講，𠵱家係人哋唔啱，唔係你唔啱，嗰次打佢係我一生人最錯嘅事。」
「我兩個仔雖然弱智，但今時今日唔會害人，人哋話乜唔使理，清茶淡飯都無所謂。」世裕去年因襲擊父親，送到訓練中心，至今不再打人，還學會叮嚀母親走路小心，「雖然唔係講乜嘢我愛你，但我都好安慰，唔使送乜送物。」
司徒太
願漂亮女兒健康成長
司徒太的女兒嘉嘉31歲，長得漂亮，無法接受自己輕度智障的事實，「佢成日覺得，我係靚女，唔係弱智，點解要同弱智嘅一齊？」但她平日會搶食物、衝馬路、發狂大喊兼扭計，「咁大個女，條底褲就嚟甩，佢即刻喺街度揭起條裙，令我哋好尷尬，但我都會帶佢見世面，唔會收埋佢。」
司徒太的母親患老人癡呆症，同時照顧兩人，令她幾乎崩潰，「我同我老公講，我哋千祈唔好嗌交呀，夫妻關係好，情緒先會好，我哋先可以捱落去。」這個母親節，她沒有特別祈求，只希望女兒可以健康成長。