花旗嗰邊繼續有不利消息，「股神」畢菲特同「商品大王」羅杰斯已經講咗幾次話花旗經濟已陷入衰退，仲有聯儲局前主席格老都係咁講，𠵱家仲加埋「大鱷」索羅斯話經濟衰退兼有排醫，你話點算？
睇吓啲投行繼續大撇賬就知有幾危，𠵱家仲話監管機構要投行「露底」，交盤數出嚟睇吓佢哋啲資本夠唔夠頂，本意係好嘅，但係邊個敢擔保唔會有「作弊」或「虛報」嘅嘢會摷埋出嚟，諗吓伯南克猛叫布殊再救市，家吓仲話研究緊要納稅人孭多啲數穩住個大局，好有「兩手準備」嘅味道，希望佢哋可以大步檻過啦。
雖然情況咁差，但前晚花旗股市仍出現技術反彈，不過，短線市況通常唔係跟經濟行，睇實美元點走，對花旗股市嘅變化應該可以捉到啲路。
港股昨日再跌，不過25000關守得住，再整固吓可以炒番上去，雖然係反彈，捉啱路都可以搵餐晏。
鞍鋼C輪9471：鞍鋼（347）昨收20.30元，逆市升2%，成交對辦，升破21.70元就睇23元，可以諗吓隻C輪9471。隻輪昨收22.5仙，槓桿率9倍（有效4倍），正股升上23元，隻輪應該唔會低過36仙，正股如果跌穿19元，個勢會轉弱，到時沽出隻輪止蝕。