迎接奧運火炬，香港特區政府全面投入奧運馬術賽與傷殘奧運馬術賽。馬術係一門好專門嘅運動，上星期睇BBC，偶然見到一個歐洲馬術賽節目，係盛裝（Dressage）賽，策騎人騎住匹馬隨音樂節奏起步，隻馬彈吓、跳吓，好似識聽交響樂咁，其實隻馬嘅動作全部由策騎員指揮，難度真係高到不得了。BBC有評述員講解如何評分，隻馬如何失分，十分詳細。香港有冇識得報導馬術賽嘅記者、編輯與評述員呢？或者唔係冇嘅，只怕唔夠啫。
我哋大部份人唔識馬術，但最識得搵錢，於是成日有人追問奧運馬術賽可否為香港帶來旅遊收益，總之有銀收最實際。左丁山俾人問得多，呢日碰到專做inbound（香港旅遊）嘅旅遊Ｗ，捉住佢問：「有冇遊客專門嚟香港睇奧運馬術？」旅遊Ｗ話：「唔係冇嘅，但目前所知，為數不多，我哋最弊唔知可唔可以買到門票，唔敢宣傳，否則遊客到港之後先至話畀佢知冇奧運馬術入場券嘅話，實俾人鬧死。現時買賣飛由中旅社做先，唔關特區政府事，中旅社又要問北京奧組委，好複雜，我都費事做嘢住。」
之不過，旅遊Ｗ話今年生意唔錯，長程客（歐美）多咗，短程客（亞洲）少咗啲啲，但佢有啲擔心，亞洲客會逐漸流失去咗澳門，因為佢有啲南韓旅遊社客戶辦多咗澳門團，直情唔住香港，一落機就去澳門中山，在中山打高爾夫球玩一至兩日，然後到澳門玩浴室及賭場兩晚，跟住坐船到港去機場鬆人。旅旅Ｗ話：「辦旅遊唔使講咁多理論，有聲色犬馬最實際，𠵱家澳門樣樣有齊，賭場又大又靚，唔同往日，旅客又特別多，競爭力好高，最啱東南亞與東北亞啲男士旅行團，呢類人使錢幾闊佬㗎，𠵱家咪喺澳門用晒囉。」
啱啱睇到《華爾街日報》講新加坡有見及此，解除四十年賭禁，金沙與雲頂都會在新加坡開賭場，對澳門產生威脅喎。旅遊Ｗ話：「你同我定，新加坡有高爾夫球場，但未必平得過中山，佢有賭場，未必靚得過威尼斯人；一樣武器，佢一定冇，就係浴室與北方佳麗！有賭場，冇女人，豪客唔去㗎！」