周日母親節10場英超直播，唔使講，大家肯定㩒遙控器轉台都轉到儍。睇波唔專一冇問題，買早飛就咪多心，我就鎖定富咸作客可以砌低樸茨茅夫，信鶴臣呢位魔術師可以變錢，益自己之餘益埋捧場客，2.1倍W抵捧。藍鑽石
記得鶴臣去年底上任嘅時候，隊波19戰得14分排尾3，當時班主阿法耶茲應承過，只要成功護級，即刻送100萬鎊（約1,520萬港元）畀鶴臣，如今隊波37場得33分，只要今場作客砌低老樸，基本上唔使理其他護級隊戰果，認真爽。
「老樸」專注英足盃
一場魔術表演，單憑個有料魔術師都未夠，好多時要有助手幫忙，你話鶴臣識用人得，好運亦得，總之到季尾身邊有麥比廸、尼維蘭呢兩個好幫手。麥比廸復出後入親嘅都係重要入球，冇得頂；至於尼維蘭（當年叫開尼夫蘭），假如你90年代已經係曼聯躉，冇理由唔識呢個挪威仔，佢當年喺曼聯就冇得威，家陣就威，近4場入2球，今場隨時再做財星。
「老樸」已經接連輸畀曼城、布力般流浪同埋米杜士堡，全隊上下、球迷擺明專注下個禮拜六對卡廸夫城場英足盃決賽，就算4連敗都唔會有人鬧。唯一擔心冇資格踢英足盃決賽嘅廸科爾搞破壞，不過憑佢一人，點都敵唔過富咸成隊一條心。呢場波富咸贏得，半場吼和，全場貼佢哋贏2:1。
畢傑推介打比郡不敗
今次係本報今季最後一次推介英超早飛，藍鑽石叫做臨尾搭單推介3次，一贏兩走盤無輸過，但成績點都唔及曾經早飛7連勝嘅畢傑。臨尾特登問佢有乜早飛心水，佢話打比郡主場對雷丁可保不敗，攞尾彩，不妨信多佢一次。
《周末早飛超級重心》
吼阿「伯」門口剪「布」
星期日26
伯明翰vs布力般流浪2:1（7.5倍）
兩星期前講過伯明翰係門口狗，至少喺自己地頭有啲水準，立場不變，加埋份搶分護級戰意，穩贏乏戰意嘅布力般流浪。射手麥法頓賽前高調話就算降班都願留效，都算有情有義。客軍射手辛達告魯斯雖勇，但直到上場作客贏放棄晒聯賽嘅老樸，至取得近4場作客首勝，客場水準難靠。再講，人家隨時降班，冇理由喺人哋地頭踩多一腳。
寧買「糖」唔買「紐」
星期日29
愛華頓vs紐卡素2:0（7.5倍）
「拖肥糖」愛華頓領隊莫耶斯講到出口，好掛住養傷嘅阿廸達同埋卡希爾，冇咗佢兩個令到中場攻擊力大減。同意，不過愛華頓都仲要攞多分至保住歐協盃參賽資格，冇理由預到咁緊，點都想搶攻爭勝，穩陣啲好。有傳紐卡素領隊奇雲基瑾同老細不和，而睇隊波上場輸畀車路士後，現晒形，根本水準未夠，賽後班球員好似謝晒，人喺球場但個心已諗住唞暑去邊度玩。
熱刺紅軍夠「大」膽
星期日33
熱刺vs利物浦2:2（12倍）
煞科多數捧主隊，但呢場就唔肯定，話晒熱刺隊波係儍嘅。近期英國方面嘅消息講到貝碧托夫走硬咁滯，呢場可能係佢喺熱刺嘅告別作，應該去馬，估佢有波入。至於利物浦，無論出正選或後備對非強隊，永冇話唔識入波，同熱刺嘅貝碧托夫一樣，利物浦後備前鋒高治可能係告別作，有份戰意。今場唔貼勝負，一於博「大」同「大」膽。