五月二日奧運火炬到港，香港電台製作上午接火炬及開跑儀式，中午在馬場由亞視製作綜藝表演，到咗黃昏，就由無綫主辦大型表演及迎接最後一棒。三個節目中，自然係無綫做得最場面盛大，因為無綫最多人才吖嗎。左丁山在馬場現場睇亞視節目十幾分鐘，只見底色全部係橙色，咦，政治不正確噃，點解唔用紅色，唔知亞視會唔會再花一筆錢將個公司標誌由橙色改為紅色或藍色呢？
左丁山不知就裏，在大看台見到有位就坐，後來見到曾局長、霍會長等大人物陸續就座，先知道椅上早已貼上名字，連忙起身望吓，自己嘅座位上有劉長樂名字，隔籬就係陳志雲，皆電視台名人也，唔怪得自己左手邊已經有亞視何定鈞坐響處。坐咗人哋個位，唔好意思噃，正欲起身離開，有一位官員話：「照坐啦，劉長樂、陳志雲唔會嚟㗎嘞。」諗落又係，一於幻想自己係電視大亨劉長樂可也。
但嘜頭唔同，邊度可以冒充大人物呀，一位區議員叫上嚟：「左丁山，落嚟傾幾句得唔得呀？」冇研究之至，傾咪傾囉。原來區議員有意競選立法會議員，要求評估吓，左丁山有話直說：「你排選票第二名，輸梗啦，排第一都未必贏。」區議員立即話自己仲年輕，四年後可以再嚟過！其志可嘉也，問佢有乜好搞作，佢話：「當務之急係用錢搞奧運宣傳，區議會攞咗筆撥款，水喉充足，但我哋搵無綫傾吓，做一個節目要起碼一百萬元，無綫大發奧運財，個個區議會都要搵無綫呀！」吓，點解唔搵另一個電視台打吓價呀？區議員話：「照我所知，政府想我哋搵無綫！」咁就冇辦法嘞，無綫真係識得如何賺錢，亞視又幾笨喎。
坐得咁上下，鬆人為上，在大堂碰到馬主N與火炬手馬術L，馬主N話要與馬術L影相留念，左丁山當然識得攝位啦。支火炬刻上火炬手名字，可收藏作為一個紀念，幾有意思，唔怪得有人坐輪椅都要揸住支火炬。