唔太鍾意食西餐，日日食中餐又會厭！咁最好食亞洲菜，日泰台越印……輪住有排食唔厭！西餐廳裏面的亞洲菜仲經常混入西菜煮法或裝飾，連賣相都更上一層樓。呢方面做得出色的TowngasAvenue，派出主廚Tommy教我哋幾招，好食又好吸引啊！單係頭盤芝麻龍脷卷伴柚子沙律，龍脷蘸黑芝麻及麵包糠後炸出筒形，有技巧有賣相又有味道，要學呀！
記者：廖秀娟
攝影：楊錦文
菜譜及示範：TowngasAvenue主廚TommyTsui
徐正國（Tommy）
在TowngasAvenue服務7年，位列主廚。入廚22年，現時每月於明愛成人教育中心擔任烹飪導師。
芝麻龍脷卷伴柚子沙律
製作時間：30分鐘 2人份
龍脷柳蘸芝麻及麵包糠，炸成黑白點點的圓筒形，外香脆而內Juicy，裏面還有柚子肉，有齊芝麻香、魚鮮香、果清香，美味的層次真夠多！
材料
龍脷柳100克、鹽/胡椒/麵粉/蛋漿各適量、黑芝麻20克、麵包糠100克、柚子肉60克、雜沙律菜20克
蜜糖檸檬汁材料：蜜糖20毫升、檸檬汁20毫升、番荽碎3克、橄欖油100毫升
做法：將蜜糖拌入一半份量的檸檬汁再拌入橄欖油後，拌入餘下檸檬汁及番荽碎便成。
做法
1.黑芝麻與麵包糠拌勻備用。龍脷柳切成長方形後以鹽及胡椒調味，依次上麵粉、蛋漿、黑芝麻及麵包糠。
2.將魚柳圍在小圓鋼模上，插上牙籤穩固位置，放入180oC油鑊炸至硬身，然後脫模，夾起再放進滾油中炸熟。
3.龍脷筒上碟，撒上柚子肉、雜沙律菜及蜜糖檸檬汁便成。
羅小姐：見你用鉗只炸一件，如果我想炸多幾件，應該點做？
答：可以唔用模，先將龍脷柳捲好，放入雪櫃雪硬佢，咁就可以一齊放落油鍋炸。
青蘋果炒西京醬黑豚肉
製作時間：30分鐘 3人份
比較甜的焦糖汁，原來與帶酒味的麵豉醬很配合！爽爽的黑豚肉，與不會過甜的青蘋果配對，果與肉的鮮與滯此消彼長，變得開胃誘人。
材料
黑豚肉200克、青蘋果1個、牛油1湯匙、糖50克、肉桂粉/清酒/清水各少許
西京麵豉醃醬材料：西京麵豉450克、清酒60毫升、味醂125克、糖225克
做法：燒紅鑊，用猛火將清酒及味醂燒至酒精揮發，放入西京麵豉及糖，轉慢火煮至糖溶掉後離火，放凉備用。
做法
1.黑豚肉切成丁粒，以西京麵豉醃醬醃2小時備用。
2.青蘋果去皮切1厘米方粒。
3.猛火燒紅鑊，將糖放入煮至糖變金黃後熄火，加牛油及水少許煮至牛油溶掉，加入蘋果粒煮約3分鐘後，最後加入少許肉桂粉拌勻。
4.燒紅另一鑊，落油將黑豚肉煎至八成熟後加入（3）中，最後加入清酒煮2分鐘後上碟。
許小姐：黑豚肉係咪日本的最好？
答：當然係日本的最好，肉質鮮甜少少，但美國、澳洲的都唔錯，都爽口。
泰混醬焗鱔
製作時間：40分鐘 4人份
混醬的材料夠晒刺激，基本上配任何材料都夠惹味，但鱔魚還有亁葱、洋葱、九層塔及唐芹快速爆香再入焗爐，肉鮮嫩而味夠濃。
材料
白鱔225克、鹽少許、粟粉5克、蒜頭3瓣（切粒）、洋葱絲30克、亁葱粒3瓣（切粒）、泰混醬4湯匙、九層塔10克、唐芹/紅椒粒各少許
泰混醬材料：黑椒碎1克、紅椒碎30克、芫荽碎20克、蒜茸10克、泰國辣椒膏90克、茄膏25克、辣椒醬20克、沙茶醬18克、水430毫升、糖膠270克、糖40克、粟粉水少許、鹽10克、雞粉10克
做法：
1.燒紅鑊，將蒜茸、芫荽碎、紅椒碎及黑椒碎炒約2至3分鐘。
2.待香味出後轉慢火，加入沙茶醬、辣椒醬、泰國辣椒膏及茄膏炒約10分鐘。
3.加入糖膠、水及糖，以慢火煮約15分鐘。
4.最後加入鹽、雞粉及以粟粉水調校濃稠，放凉備用。
做法
1.預熱焗爐至200oC。白鱔汆水去潺，切件用鹽調味後上粟粉，燒紅油鑊用猛火走油至半熟備用。
2.燒紅鑊，轉慢火爆蒜粒及亁葱粒至金黃，加入洋葱絲及紅椒粒炒約2分鐘。
3.轉大火，放入白鱔及泰混醬約炒3鐘，離火加入九層塔及唐芹粒。
4.白鱔用錫紙包好，放入焗爐焗5分鐘便成。
章小姐：點解鱔要炒完再焗？如果冇焗爐，炒到佢熟得唔得？
答：用錫紙焗會存味啲，特別用咗九層塔，一齊焗會好香；如果炒，就要最後先下九層塔，唔係就會走晒啲味。
梨木雪耳燉湯
製作時間：3小時10分鐘 4人份
做靚湯其實不用太花費，心機都可以搭夠！就如這個素菜燉湯，沒半點肉與矜貴食材，但甜美、滋潤過人，貴在心血與時間。
材料
雪梨40克、木瓜30克、紅棗2粒、桂圓肉6粒、南北杏3克、雪耳10克、無花果亁1粒
素菜湯底材料：竹蔗12安士、茅根8安士、馬蹄12安士、甘笋1磅、水10碗
做法：將所有材料洗淨，放入煲內用中火煲約1小時。
做法
1.將雪耳用凍水浸透後備用。
2.所有材料放入燉盅內，加入素菜湯底，放入爐內用慢火隔水燉2小時。
林小姐：用紫砂壺燉湯，除咗靚，仲有無好處㗎？
答：紫砂有輕微吸油作用，用嚟燉湯油會少啲，燉雞及燉鱔都幾好㗎！
網上重溫
http://cooking.appledaily.com