早輪金管局總裁任志剛喺立法會話，市場競爭人才激烈，佢哋寶號唔少專才都流失咗去私營機構。噚日畢馬威中國就公佈，今年4月離開工作咗13年嘅金管局前助理總裁唐培新（SimonTopping，圖），加盟呢間屬四大之列嘅會計師行，擔任風險諮詢服務主管，主要負責金融業風險管理，特別喺有關《巴塞爾II資本協定》，同埋監管與規管問題等工作。
曾先後任職英倫銀行、國際貨幣基金組織嘅唐培新，對巴塞爾新資本條例簡直滾瓜爛熟，加盟畢馬威從事監管工作，更加係佢嗰杯茶，因為喺金管局嗰陣，佢正正係負責風險管理、公司治理，同推動銀行符合巴塞爾II協定嘅金管局大員。
連任總喺唐氏離職時，都充份肯定佢喺銀行政策，同埋制訂資本協議II方面嘅貢獻，就知佢係銀行監管方面嘅專家。