大市窄幅上落，缺乏方向，嘉賓沈振盈表示現水位不是入貨好時機，更可以分階段沽貨，短期可以即日買賣牛熊證。
孫：孫柏文 沈：沈振盈
孫：有乜特別股份可以值得一提？
沈：主力重磅國企股升完之後，輪到二三線國企股起步，例如東北電氣（042），另外中國電信（728）表現亦突出。
孫：中電信係唔係炒電訊業重組消息？
沈：重組消息未必可以盡信，佢股價喺5蚊邊唔算貴，雖然固網增長慢，不過間公司日後大力發展寬頻業務對佢股價有利。
孫：油價升穿120蚊，對航運股會唔會有影響？
沈：航運股相對落後，呢一個升浪入面佢哋升得唔多，油價影響航運股嘅因素已經喺股價反映咗。中海集運（2866）走勢唔錯，睇到佢已經摸咗底，可能會有短期反彈。中遠太平洋（1199）亦有同樣情況，係短時間博反彈唔錯選擇。
孫：中鐵建（1186）做咗上市後新高，佢未來走勢如何？
沈：中鐵建可能要喺現水位整固一下，如果喺13蚊樓上停一兩日就有機會爆升一吓，不過長揸嚟講佢嘅市盈率就太貴。
想高追入馬鋼
陳小姐：想講下馬鞍山鋼鐵（323），我曾經喺3.8蚊入過，5.2蚊放咗，我見三隻鋼鐵股，首長國際（697）、鞍鋼（347）同馬鋼都輪流炒，咁𠵱家可唔可以追番入去？
沈：你已經係一個好有觸覺嘅投資者，因為你睇到市場上好多時都有輪流炒作情況，你見佢哋三隻股份已經開始從低位收集緊資金。你喺5.2走咗，我唔想你𠵱家再追入，如果你高追我建議你等多兩三日，佢再跌一跌之後入貨。反而我呢兩日留意首長國際有機會升一升，佢跌過去2.4蚊後打咗底，𠵱家慢慢升緊上嚟，喺2.6蚊邊買把握較高。
北角陳小姐建議
建議買入價：5.38元
目標價：6.00元
止蝕價：-
時期：兩星期
睇好湖南有色
程小姐：湖南有色（2626）去到3.1蚊可唔可以買？
沈：我相信高位調整浪就快去到尾聲，𠵱家摸緊底，3.1蚊入都算合理，不過要買金屬股，我就未必會買湖南有色。
程小姐：我覺得佢有升值潛力。
沈：湖南有色呢啲水位只係一般。佢真正大升就未係時機，因為唔知市場幾時會炒番商品，加上你要睇金屬價格趨勢，所以止蝕位可以放喺2.9蚊左右。
沙田程小姐建議
建議買入價：3.00元
目標價：3.6元
止蝕價：-
時期：一星期
江銅上望22蚊
莫先生：我想講江西銅業（358），12蚊買入，30蚊左右放咗部份，收返晒成本，𠵱家仲有嘅貨，我上望佢上返跌幅一半，到22蚊左右。
沈：之前炒到30幾蚊估值比較貴，當時熱炒金屬類股份，無留意到銅價波動影響，之後跌番落嚟，你睇佢股價去返跌幅一半都好合理。
孫：你要小心，如果銅價進一步上升，未必可以支持佢今年股價一直上，不過江銅本身已經做少咗好多對冲。
沈：其實莫先生𠵱家嘅投資策略已經無壓力。
莫先生：我希望佢去番17蚊再入貨。
沙田莫先生個案
買入價：-
目標價：22元
止蝕價：-
時期：三星期
每日收市後4:30pm
歡迎click入 http://finance.appledaily.com以webcam參與節目及收看
歡迎phonein28698262暢談心得
亦可nemail至mailto:[email protected]搶先貼股