近年，華華幾乎都冇錯過國泰航空（293）周年股東會，仲年年都見到副主席陳南祿嘅一位女粉絲。話說國泰每次開股東會，呢位女股東都會準時現身，而且次次帶埋相機，對住陳南祿係咁影，好多時仲會搵人幫佢同偶像影合照。
噚日，華華喺國泰股東會又見到佢芳蹤，今勻女粉絲一見陳南祿，就攞咗張上年兩人嘅合照，叫陳南祿簽名留念，仲開埋期票話，下年送番張單人靚仔相畀佢做回禮，坐喺陳南祿旁邊嘅非常務董事何禮泰，見到此情此景，即刻贈興話：「乜你都有粉絲㗎！」
何禮泰：乜你都有粉絲
之不過，粉絲大多數都係三心兩意，當呢位股東見到獨立非常務董事柯清輝時，又主動要求同佢影合照，但柯大俠就耍手擰頭，走夾唔唞拒絕咗。
程志遠攝