上星期興致勃勃同肥婆四上飛鵝山遊車河，月黑風高飽暖想郁吓之際，阿珍竟然話要趕返屋企睇港版《噢唇易呢份》！如入寶山空手回，下定決心，我要喺車度裝番個電視，仲要睇高清！今日即試呢部裝咗高清機頂盒嘅豐田Porte，為免再次臨門失機，我遊走西環再經銅鑼灣去柴灣試真啲，沿途告士打道東廊都無窒，收得勁清，比起以前啲低科技汽車電視好好多。
文：嘴嚼爺
攝影：陳陶鈞
Model：Joanne
講番架Porte，1,500c.c.車仔最正係左邊電趟門，㩒個掣就識自動開閂，上落非常方便，雖非四門設計，但就算後座上落都毋須瞓低前排，夠晒位畀後座乘客落車，實用性真係贏晒同級車。
加埋新包圍、霧燈同15吋合金軨，外形望落極似迷你版Alphard，不過就多添時尚味，無咁成熟老餅。內櫳經過改裝，座椅全新拉雙色皮，車頂又加埋格仔麖皮同LED，豪華得嚟亦夠年輕。唔好睇佢車仔細細，裏頭空間極為寬敞，加上平地台無中間手枕位阻頭阻勢，喺車廂內由左去右、由前去後都唔使落車，玩遊戲真係好方便。
出奇爽住去
對馬力無期望，反而有驚喜，圍住港島揸咗一大段路，載住Model同體重200磅攝影師，依然可以爽住去！引擎用上同廠Corolla嘅1NZ-FE1.5偈，推動細小Porte綽綽有餘，行公路或上斜都比想像中有力，去到太古城對出東廊，仲要攝影師提醒：「喂，呢度有快相，要收油呀！」
雖然講到悶，但仍不得不提呢類揭背車有幾適合香港環境；試車當日不斷要泊車，無論喺銅鑼灣窄位用頭入，或者喺柴灣貨倉樓下掉頭，都完全無壓力，而且呢架車裝咗後波泊車鏡頭，只要一入後波，就算睇緊電視都會自動轉番車後畫面，好使好用。
講到尾耗油先係重點，Porte耗油量16.0km/L令人踩得安心，牌費同1,300c.c.房車一樣，不過外形再配上電門嘅實用性，何止贏一條街！
保證無雪花
喺告士打道車行門口上車，已經見到車內屏幕播緊咩時事常識問答比賽，好清好順，即時向西環出發！沿途經金鐘去堅尼地城，只係每逢過橋底位有少少窒，其他時間接收都好OK。不過去到西環，一俾高樓大廈包圍，畫面就停咗喺度，到見到海同天先再次收到訊號。之後由西到東，沿途行告士打道、東廊接收都無問題；去到小西灣都算開揚，就算喺工業區都收到，只不過有少少窒。影大相時對正大海，同喺屋企睇電視一樣咁清咁順。不過可能高清訊號始終未全面覆蓋，所以去到鬧市，好似喺銅鑼灣咁，就完全收唔到訊號。
總結一下，其實喺車度裝機頂盒，始終個芒唔大，所以感受唔到有幾高清，但一定比舊有汽車電視穩定，起碼唔會沙沙聲睇雪花又要追台咁麻煩。
繞港一周試接收
唔係收唔到，不過窒窒吓，成日望住同一個畫面好似Hang機咁，梗係打喊露啦。
雖然係港島東最篤，但因為空曠，海邊一帶大廈都唔算密集，所以收得勁好勁順。
入到銅鑼灣即死，若然真係咁想追劇，不如去電器舖睇幾廿部Display好過。
豐田Porte規格表
引擎：1,496c.c.直4DOHC
馬力：109ps/6,000rpm
扭力：14.4kgm/4,200rpm
傳動：4前速自動波，前輪驅動
車輛提供：富利堡（28772700）