大企業越嚟越注重形象，講社會責任，好似滙豐就最鍾意叫班員工去做義工，為公司省靚個招牌。要班細嘅出力，做大嘅梗係唔可以淨係得把口，點都要做番啲嘢激勵士氣。滙豐大班鄭海泉同埋執行董事王冬勝，上個月就做東，請百幾個義工隊員食大餐，鄭大班仲帶埋老婆出席，等大家知佢幾重視餐飯。
鄭大班話，間行嘅義工隊成立咗15年，開頭100人都冇，家吓就已經超過2500人，每年大大小小籌款活動成百幾個，員工額外用34萬個小時做義工，計落平均每人每年用5.7日私人時間去幫人。
事先張揚太座到場
滙豐發言人話，鄭大班一早通知佢哋會帶埋老婆到場，因為鄭太曹志安對義務工作好有興趣同經驗，飯局當晚仲四圍同班義工傾偈，分享心得，影埋大合照，都不知幾開心。