雞記豪變　女王的密室

要Call貨Van個個諗起雞記，咪以為搵食車講經濟效益，唔會揼本執靚架車，查實好多車主覺得一日對足十幾粒鐘，樣衰衰點對得住自己。所以好多司機大佬都鍾意同愛驅扮靚靚，你無天份唔緊要，日產原廠執靚埋畀你，點止自己開心咁簡單，直頭將伴侶當女王咁招呼都仲得！

記者：梁美甜
攝影：陳盛臣
模特兒：Ray、Suyen

■「猛囗Van王」用上原廠Nismo改裝配件及拉花，充滿日系格調。

日產將新款頂級版Urvan進行改裝，一口氣推出四款特別版，兩款玩外觀、兩款則以豪裝內櫳為主，各有型格各有市場，誓要踢走貨Van悶蛋形象！

■軟綿綿黑皮車頂，將內櫳變成一個好夢幻嘅私竇。

■連紙巾盒都襯埋紫黑花紋，姣到出晒面。

誇張平實一車兩味

特別版中最令人深刻嘅莫過於呢一款酷囗Van王，第一觀感同Nissan另一搞鬼作ElgrandLoveMusic好鬼似，有種豪華MPV嘅感覺；前座布局全部由膠料改用黑桃木配襯，包括軚環、門枕、中控台、波棍及椅背書桌等，內裝篷頂及皮椅就選用黑色為主嘅皮料，地毯更用上姣爆黑＋紫，就連紙巾盒都係紫色毛毛，最畫龍點睛係嗰幾條藍光LED燈，夜晚揸出街真係Cool爆！成個內櫳充份賣弄Fantasy感覺，女仔坐上去嗰排軟綿綿座椅，肯定覺得尊貴如女王，絕非一般MKVan可比！
至於另一款玩內櫳嘅尚囗Van王，設計基礎與酷囗Van王大致相同，但用上原色桃木及皮料，以及轉用淡黃色LED燈及白色花紋圖案地毯，整體較酷囗Van王較為平實，更見格調。

■中排LoveSeat超舒服，坐到唔願落車。

港日變裝　各有特色

最後兩款Urvan就玩外觀變裝，其中炫囗Van王用上土炮醒目改件，全車加裝跑車式大包圍，包括一體化前後擾流、車側裙邊、輪拱、車門雨擋、前後定風翼連煞車燈等，滲出強烈暴走族味道！
而猛囗Van王就更勁，以原廠專屬改裝品牌Nismo為賣點，將Nismo配件襯落車身，包括前置擾流及車尾高置定風翼，再加原廠同色泥擋、電鍍後魚眼鏡同尾門手柄等，令整體跑感提升不少。