現年19歲嘅文詠珊（JaniceMan）同24歲嘅鄧麗欣（Stephy），兩代少男殺手噚日再度交鋒，第一日為新片《內衣少女》開工，喺跑馬地墳場拍攝出席葬禮嘅戲。狂sell青春嘅Janice着露肩裝搶鏡，又話角色勝在夠年輕，Stephy眼見風頭被搶，於是不理儀態彎身𢱑痕，為玉腿𢱑足一分鐘，出動騎呢招搶焦點。
Stephy同Janice飾演表姊妹，噚日佢哋着住黑色素服拍戲，不過Janice嘅露肩連身短裙較性感，謀殺唔少菲林，但Stephy都唔執輸，趁空檔當眾𢱑痕，事後佢就自辯話：「呢度多蚊，我啱啱先噴完驅蚊水。」當提到同Janice同場惡鬥，Stephy就講：「我同Janice嘅年齡差好遠，佢後生咁多，先至係少男殺手。」
高志森喜親近靚女
Janice就老實不客氣，話自己嘅觀眾目標係較年輕嘅一群，擺明同Stephy爭fans，Janice又忍唔住晒青春：「我戲裏面個角色較後生，所以衣着要青春啲。」片中Janice會吸引一班上咗年紀嘅男演員，所以有報道形容佢係阿伯殺手，佢即時表現反感話：「邊係阿伯呀！頂多咪阿叔殺手，兩樣差好遠。」佢仲強調擇偶條件係男友唔可以大過自己10年。高志森就做串星，佢猛話可以同Stephy及Janice合作，值回票價喎。