奧運聖火上周五於香港傳遞，大批市民沿途歡呼吶喊。聖火本已轉到內地傳送，昨日卻突然出現在旺角，更有疑似煲呔曾擔當跑手，原來是詹瑞文宣傳《男人之虎》，圍觀市民看見都笑不攏嘴，但有阿伯嫌他阻街，罵他黐線。
詹瑞文為宣傳其舞台劇《男人之虎2008超級防火版》，昨日化身奧運火炬手，在兩名藍衣人護送之下到旺角傳聖火。詹瑞文戴上假髮頭套、金絲眼鏡和煲呔，擺明揶揄之前一直被指是香港第一棒奧運火炬手的特首曾蔭權。
彈曾憲梓碌住跑
詹瑞文在聖火傳遞前接受記者訪問說：「今日我嚟補跑，係知道煲呔好想跑，還佢一個心願，亦為咗支持奧運同埋香港運動員，因為火炬手名單入面得三分之一唔夠多，咁又令我睇到有好多火炬手平日都好少運動，揸住支火炬好易跌咁。」
問阿詹覺得那一位火炬手跑得不夠好時，他即笑說：「我淨係講正統嗰啲啦，華仔同方力申跑得唔錯吖，李麗珊、高禮澤同黃金寶身為運動員就冇問題，陳慧琳就睇得出好少跑步喇。」
談到無綫總經理陳志雲被指邊跑邊扭腰時，阿詹即說：「即係少跑啦，不過冇人趴喺度已經好好㗎喇。至於曾憲梓先生就唔算跑，係碌住跑。」他又提到《男人之虎》至今已演出128場，希望今次移師沙田演出能突破150場。
火炬放家中防盜
之後詹瑞文帶同藍衣人開始傳遞火炬，又與附近商舖和路人打招呼，不過卻多次未能成功點火，又有路過阿伯嫌阿詹及一眾記者阻路，罵他「唔知黐咗邊條線」，阿詹即報以微笑。
阿詹傳完聖火後，直言要把火炬放在家中，用來防盜，他還搞gag說：「今日好擔心長毛（梁國雄）會嚟撲熄我啲火，但佢冇到，唔知會唔會喺轉角位伏我呢？」
採訪：藍文浩
攝影：陳志嵐
